ევროკავშირის წარმომადგენელ, კრისტიან დანიელსონს მმართველი პარტია და ოპოზიცია ერთად ხვდება. დაპირისპირებული მხარეები ამ ვიზიტის ფარგლებში ერთი მაგიდის ირგვლივ დღეს პირველად ვიხილეთ.

პარტია გირჩი - მეტი თავისუფლების ლიდერის, ზურაბ ჯაფარიძის თქმით, შესაძლოა, მომლაპარაკებლებმა შეძლეს მხარეთა პოზიციების დაახლოება.

"თავისთავად ის ფაქტი, რომ მომლაპარაკებლებმა გადაწყვიტეს ერთად დავსხდეთ მოლაპარაკების მაგიდასთან ოპოზიცია და ქართული ოცნება, შეიძლება გულისხმობდეს იმას, რომ მათ შეძლეს პოზიციების დაახლოება. ეს შეიძლება იყოს ოპტიმიზმის საფუძველი. ოღონდ, კიდევ ერთხელ გეუბნებით - შეიძლება. ეს არ არის ნამდვილად ასე, მაგრამ, შეიძლება ეს ამის ნიშანი იყოს...

არცერთ მხარეს არ აქვს სრული ინფორმაცია, აქვს მხოლოდ და მხოლოდ მომლაპარაკებლებს. მე გამიჭირდება კომენტარის გაკეთება იმაზე, როგორი შეხვედრა იქნება და რა ფორმატი იქნება. ვიცი, რომ იქნებიან "ოცნების" წარმომადგენლებიც. ერთადერთი რაც ვიცი, არის ეგ", - განაცხადა ზურაბ ჯაფარიძემ ოფისში შესვლამდე.

სტრატეგია აღმაშენებლის ლიდერის თქმით, მოლაპარაკების დოკუმენტში ექვსივე პუნქტი, მათ შორის რიგგარეშე არჩევნებისა და პატიმრების გათავისუფლების საკითხი უნდა დარჩეს.

„ჩემთვის პრინციპულია რომ ექვსივე საკითხი იყოს დოკუმენტში და თითოეულ ამ საკითხზე იყოს შეთანხმება. რა თქმა უნდა, დიდ ანგარიშს გავუწევ დასავლელი პარტნიორების პოზიციას, მაგრამ ყველასთვის ცნობილია ჩვენი პოზიციებიც. ყველა საკითხი უნდა იყოს დოკუმენტში. საუბრებია, რომ რიგგარეშე არჩევნების ან პატიმრების საკითხი ამ დოკუმენტიდან ამოვარდება, პირდაპირ გეუბნებით, ამის 1%-იან შანსსაც არ ვუშვებ. ასე არ დგას საკითხი, ეს არის არასწორი ინფორმაცია, რაც ვრცელდება. ორივე ეს საკითხი აუცილებად იქნება“,- განაცხადა ვაშაძემ.