"მოქალაქეების" ლიდერის ალეკო ელისაშვილის თქმით, ოპოზიცია პარლამენტში შევა, პოზიციების დაახლოებაზე მუშაობა კი ინტენსიურად მიდის. მისი განმარტებით, მოლაპარაკებების პროცესში ცოტა საკითხია დარჩენილი, სადაც პოზიციები არ დაახლოებულა:

"რა ინფორმაციასაც ვფლობ, საკმაოდ ინტენსიურად მიდის აზრთა გაცვლა- გამოცვლა და პოზიციების დაახლოვება. პარლამენტში რომ შემოვლენ, ეს ხომ ფაქტია. აბა, სხვა სად წავლენ? არიქა, ჩვენ სამშობლოს ვუღალატეთ, საქართველო გავყიდეთ და დავახურდავეთ, 30 ვერცხლად გავყიდეთ - ასე წარმოაჩინეს მაშინ, როდესაც გულის სიღრმეში თავადაც იცოდნენ, რომ აუცილებლად მოუწევდათ პარლამენტში შემოსვლა და მოლაპარაკებების ერთ-ერთი წინაპირობა ესაა. არ მინდა, მოლაპარაკების დასკვნით ეტაპზე ნიშნის მოგებით საუბარი, ხალხი ისედაც ყველაფერს მიხვდება. კი, პარლამენტში შემოვლენ, დიახაც. პოზიციების დაახლოება ინტენსიურად მიდის და ძალიან ცოტა საკითხი დარჩა, სადაც პოზიციები არ დაახლოვებულა,"- განაცხადა ელისაშვილმა.