ტვ პირველის საინფორმაციო სამსახურის უფროსი ნოდარ მელაძე და ჟურნალისტი მაკა ჩიხლაძე სკანდალური აუდიოჩანაწერების საქმესთან დაკავშრებით პროკურატურაში გამოკითხვაზე მისვლას არ აპირებენ - ამის შესახებ უფლებადამცველმა გიორგი მშვენიერაძემ სოციალურ ქსელში დაპოსტა.

"ნოდარ მელაძე და მაკა ჩიხლაძე არ აპირებენ პროკურატურაში მისვლას და გამოკითხვაში მონაწილეობას მათ მიერ მომზადებულ ჟურნალისტურ გამოძიებასთან დაკავშირებით. ამის შესახებ პროკურატურა ინფორმირებულია ჩემს მიერ.

სამწუხაროა, რომ პროკურატურა თავად აუდიო ჩანაწერით აქამდე არ დაინტერესებულა, რომლის გადაცემის მზაობას ვაცხადებდით და ვაცხადებთ", - წერს მშვენიერაძე.

შეგახსენებთ, რომ საქმე ეხება აუდიოჩანაწერს, სადაც ბერა ივანიშვილის, ირაკლი ღარიბაშვილისა და ანზორ ჩუბინიძის სატელეფონო საუბარია. ჩანაწერთან დაკავშირებით პროკურატურამ გამოძიება კერძო საუბრის უნებართვო ჩაწერის ან/და მიყურადების, ასევე კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის უკანონოდ გამოყენებისა და გავრცელების ფაქტებზე დაიწყო და არა იმ შესაძლო დანაშაულზე, რომელზეც სატელეფონო ჩანაწერშია საუბარი.