ოპოზიციონერ ლიდერებთან შეხვედრის შემდეგ დანიელსონმა მოულოდნელი შეხვედრა გამართა პრეზიდენტ სალომე ზურაბიშვილთან. ეს მათი რიგით მეორე შეხვედრაა და საგულისხმოა ის, რომ დაუგეგმავად მოხდა. შესაბამისად, ოპოზიციურ სპექტრში გაჩნდა ეჭვი, რომ ევროპის საბჭოს პრესზიდენტის შარლ მიშელის სპეციალურმა წარმომადგენელმა დანიელსონმა ზურაბიშვილს პოლიტპატიმრების გათავისუფლების თხოვნით მიმართა.

რაზე ისაუბრეს მხარეებმა, უცნობია, რადგან შეხვედრის დასრულების შემდეგ კომენტარები არ გაკეთებულა, თუმცა, ცოტა ხნის წინ პრეზიდენტის ადმინისტრაციამ გაავრცელა ინფორმაცია, სადაც ნათქვამია, რომ ორბელიანების სასახლეში გამართულ მეორე შეხვედრაზე საქართველოს პრეზიდენტმა და კრისტიან დანიელსონმა ხელისუფლებასა და ოპოზიციას შორის მიმდინარე მოლაპარაკებების პროცესი განიხილეს. ინფორმაციაში მეტი კონკრეტიკისგან პრეზიდნტის ადმინისტრაციამაც თავი შეიკავა.

შეგახსენებთ, რომ დანიელსონი ბრიუსელში დღეს უნდა დაბრუნებულიყო, თუმცა მოლაპარაკებების გაგრძელების მიზნით მან თბილისში ვიზიტი ერთი დღით გაახანგრძლივა.