პოლიტოლოგი გია ხუხაშვილი "ინტერპრესნიუსთან" "ქართული ოცნების" თავმჯდომარის ირაკლი კობახსიძის განცხადებას აფასებს და აღნიშნავს, რომ ამ "თავხედური განაცხადით კობახიძემ სტუმარს წიხლი ჩააზილა".

ხუხაშვილის განმარტებით, ოცნება ცდილობს, მოლაპარაკებებზე შეთანხმება არ შედგეს და ვითარება თავის სასარგებლოდ შემოატრიალოს:

"წარმოუდგენელი იყო კობახიძის აბსოლუტურად თავხედური განცხადება. ფაქტობრივად სტუმარს წიხლი ჩააზილა, წადი აქედან, საკმარისია უკვეო. ამის მერე დანიელსონი ამბობს, რომ არსად არ მიდის. ვფიქრობ, ჩვენ ვართ იმ მდგომარეობაში, რომ ხელისუფლება აგრძელებს მცდელობას არა მოლაპარაკების და შეთანხმების მისაღწევად, არამედ მცდელობას ვითარების გადატეხვის თავის სასარგებლოდ. ხელისუფლება ფიქრობს, რომ კუნთები მას უფრო მეტი აქვს და ძლიერია. ასეთი პოლიტიკით ცდილობს გადააგოროს ეს პროცესი და დაუბრუნდეს პირველ ჩვენებას, როდესაც თვითონ არის სტერილური და აბსოლუტური ძალაუფლების მფლობელი და დანარჩენი პოლიტიკური ელიტა თამაშგარე მდგომარეობაში არის. დაახლოებით, ასეთი მიმართულებით მოძრაობენ და როცა დასჭირდებათ, კონსტრუქციულობანას იმიტაციას ახდენენ“ , - განაცხადა ხუხაშვილმა.

შეგახსენებთ, გუშინ ირაკლი კობახიძემ განაცხადა, რომ ხელისუფლებასა და ოპოზიციას შორის მოლაპარაკებები ვიზიტის შემდეგ გაგრძელდება. ცოტა ხანში კი კრისტიან დანიელსონმა გააკეთა განცხადება, მოლაპარაკებების პროცესის წინ წასვლისთვის თბილისში კიდევ ერთი დღით დარჩება.