"ყველა აღმოვჩნდით ძალიან გაურკვეველ სიტუაციაში“- ხელისუფლება მოლაპარაკებათა მაგიდის აყირავებას ცდილობს - პოლიტიკური კრიზისის განმუხტვა ვერ ხერხდება

პოლიტიკა - 10:33, 15 Mar, 2021

1058

გუშინ დასავლელი შუამავლების მეშვეობით გამართული შეხვედრა ხელისუფლებასა და მის ოპონენტებს შორის მთელი დღის განმავლობაში მიმდინარეობდა, ევროპული საბჭოს პრეზიდენტის შარლ მიშელის პირადი წარმომადგენელი კრისტიან დანიელსონი კი ამ წუთებშიც ოპოზიციური პარტიების ლიდერებს ხვდება. შეხვედრას აშშ-ს ელჩი საქართველოში კელი დეგნანიც ესწრება.

დიპლომატებს შეხვედრის დაწყებამდე მედიასთან კომენტარები არ გაუკეთებიათ. ოპოზიციის ლიდერების თქმით, მოლაპარაკებებზე მოთხოვნა უცვლელია, რაც მედიაციის პროცესში პრობლემად რჩება. ხელისუფლების ოპონენტების განცხადებით, ოცნებას დიალოგის შეფერხების მცდელობა ჰქონდა, თუმცა, დასავლელი პარტნიორები ყველაფერს აკეთებენ, რომ მოლაპარაკებაქ შედგეს:

"მე ვფიქრობ, რომ მთავარი პრობლემა, როგორც ჩანს რიგგარეშე არჩევნები და პოლიტპატიმრების არგამოშვების საკითხია, მაგრამ გუშინ, მე დავინახე ქართული ოცნების მხრიდან მოლაპარაკების ფაქტობრივად შეფერხების, თუ არა ჩაშლის მცდელობა, ჩვენ დასავლელ პარტნიორებს დიდი მადლობა რომ უძლებენ ამ ფსიქოლოგიურ სტრესს", - განაცხადა "სტრატეგია აღმაშენებლის" ლიდერმა გიორგი ვაშაძემ.

"ევროპული საქართველოს" წევრის, დავით ბაქრაძის განცხადებით, დანიელსონმა მხარეებს კიდევ ერთი შანსი მისცა, თუმცა საბოლოო შედეგზე პასუხისმგებელი ამ შემთხვევაში ხელისუფლებაა:

"მოგვცეს ყველას ერთად კიდევ ერთი შანსი, კიდევ ერთი დღე, რომ ქვეყანა გამოვიყვანოთ კრიზისიდან, ამიტომ, ამ შანსს სჭირდება გამოყენება, ჩვენ ისე როგორც წინა დღეებში სრულად ვართ განწყობილი, რომ ეს შანსი და ეს შესაძლებლობა გამოვიყენოთ და შეთანხმების გზით გამოვიყვანოთ ქვეყანა კრიზისიდან. ყველაფერი დამოკიდებულია ქართულ ოცნებაზე, განსაკუთრებით გუშინდელი საღამოს შემდეგ, სრული პასუხისმგებლობით შემიძლია გითხრათ, ახლა ყველაფერი, ბურთიც, პასუხისმგებლობაც, ყველაფერი არის ქართული ოცნების მოედანზე", - განაცხადა ბაქრაძემ.

"გირჩი-მეტი თავისუფლების" ლიდერის, ზურა ჯაფარიძის განცხადებით ყველა გაურკვეველ სიტუაციაში აღმოჩნდა, როდესაც "ქართული ოცნება" საჯაროდ დაემშვიდობა დანიელსონს, მან კი განაცხადა, რომ მოალაპრაკებები გრძელდება.

"ყველა აღმოვჩნდით ძალიან გაურკვეველ სიტუაციაში, ოცნების წარმომადგენლები გამოვიდნენ, საჯაროდ დაემშვიდობნენ ადამიანს, თქვეს, რომ მოლაპარაკებები ამ ეტაპზე დასრულებულია, და ისინი ელოდებიან როდის დაბრუნდება ღარიბაშვილი ბრიუსელიდან ვიზიტიდან და ამის შემდეგ გაგრძელდება მოლაპარაკებები. ამის შემდეგ დაახლოებით, ნახევარ საათში ევროპული საბჭოს პრეზიდენტის პირადი წარმომადგენელი გამოვიდა და თქვა, რომ მოლაპარაკებები გრძელდება", - აღნიშნა ჯაფარიძემ.

ენმ-ს წევრის აკო მინაშვილის განცხადებით, ხელისუფლება მოლაპარაკებებისთვის მზად არ არის:

"მათი განწყობით ჩანდა რომ არ სურთ ამ მოლაპარაკებების გაგრძელება. რითი ჩავა ღარიბაშვილი 16-ში ბრიუსელში, ცარიელი ხელებით ჩავა ნამდვილად. პრინციპში, უფრო დაამძიმებს მათ ვითარებას, თუ ისინი არაფრით არ ჩავლენ ბრიუსელში, ეს ხომ ცალსახაა. ეს კიდევ ერთხელ დაარწმუნებს ჩვენს მეგობრებს, რომ მათთან თანამშრომლობა უბრალოდ ძალიან რთულია" - განაცხად მინაშვილმა.

შეგახსენებთ, რომ დანიელსონმა საქართველოში ვიზიტი დღევანდელი შეხვედრების გამო კიდევ ერთი დღით გაახანგრძლივა.