პრემიერმინისტრი, ირაკლი ღარიბაშვილი ბრიუსელში გაემგზავრება. მთავრობის მეთაური ხვალ საქართველო-ევროკავშირის ასოცირების საბჭოს რიგით მე-6 სხდომას დაესწრება.

ვიზიტი საქართველოში არსებული უმწვავესი პოლიტიკური კრიზისის ფონზე წარიმართება.

ოპოზიცია და ხელისუფლება ამ დრომდე ვერ შეთანხმდა ევროპული საბჭოს პრეზიდენტის, შარლ მიშელის მიერ დატოვებულ ჩარჩო-დოკუმენტზე.

პირველ შეხვედრას ირაკლი ღარიბაშვილი დღეს ევროპული საბჭოს პრეზიდენტ შარლ მიშელთან გამართავს. შარლ მიშ3ელი ღარიბაშვილისგან კონკრეტულ ნაბიჯებს ელოდება.

16 მარტს, საქართველო-ევროკავშირის ასოცირების საბჭოს სხდომის შემდეგ, გაიმართება პრემიერ-მინისტრ ირაკლი ღარიბაშვილის, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის ჟოზეფ ბორელის და ევროპული სამეზობლო პოლიტიკისა და გაფართოების საკითხებში ევროკომისარ ოლივერ ვარჰეის ერთობლივი პრესკონფერენცია.

17 მარტს მაღალი დონის შეხვედრები შედგება ევროპარლამენტსა და ნატოში. საქართველოს მთავრობის მეთაურს ნატოს შტაბბინაში ალიანსის გენერალური მდივანი იენს სტოლტენბერგი უმასპინძლებს. ასევე, დაგეგმილია ნატო-საქართველოს კომისიის სხდომა.