"ზღვარს გადასული ქმედება და რელიგიური შინაარსის ღონისძიებაში, მისი ჩაშლის მცდელობით შეჭრა" ,- ასე აფასებს საპატრიარქოს საზოგადოებასთან ურთიერთობის სამსახურის ხელმძღვანელი, ანდრია ჯაღმაიძე, 8 მარტს მარტვილში, წყონდიდის ეპარქიაში მომხდარ ინციდენტს და ბრალს მედიასაც სდებს, განსაკუთრებით დამნაშავედ კი "მთავარი არხის" ჟურნალისტი მიაჩნია.

დეკანოზი ანდრია ჯაღმაიძე ამბობს, რომ შეკრებილი ხალხი მრევლი არ იყო, ვინაიდან, მისი თქმით, "მრევლი არ ამბობს "წადი, წადი-ს" და "მონებოს". აქ იყო სხვა განზრახვა, შეჭრის მცდელობა".

"ჩვენ კადრებში ვნახეთ და დღეს გავავრცელებთ სხდომაზე შიგნით გადაღებულ კადრებს, რომ იქ პირველი შეიჭრა "მთავარი არხის" ჟურნალისტი. ეს პირველი შემთხვევა არ არის. ჩვენ გვახსენდება, რომ სულ ცოტა ხნის წინ სწორედ ამ ჟურნალისტმა ფაქტობრივად ჩაშალა წირვის პროცესი და მრავალი ეპისკოპოსის თანდასწრებით მოხდა ეს. ეს არის იმისი დადასტურება, რაც მიმდინარეობს ეკლესიის წინააღმდეგ". - განაცხადა ჯაღმაძემ.

ჯაღმაიძე უკმაოფილებას გამოთქვამს ომბუდსმენის მიმართ და აცხადებს , რომ - "მსგავსი რამ რომ მომხდარიყო ნებისმიერი სხვა კონფესიის შემთხვევაში, მგონი ეჭვი არ გვეპარება, რომ დღეს ადამიანის უფლებების დამცველი და საერთაშორისო ორგანიზაციები ამაზე ძალიან მძაფრ განცხადებას გააკეთებდნენ".

აქვე გეტყვით, რომ კოალიციამ მედიის ადვოკატირებისთვის 8 მარტსვე განაცხადა, რომ ის, რაც მარტვილში მოხდა, დანაშაულის ნიშნებს შეიცავს.

კოალიციამ დაწერა, რომ გარდა სხეულის დაზიანებისა, გავრცელებული კადრებიდან ჩანს, თუ როგორ უშლიდნენ ხელს სასულიერო პირები ჟურნალისტებს პროფესიული მოვალეობის შესრულებაში.

მათ შსს-ს მიმართეს, დროული რეაგირებით შეისწავლოს ჟურნალისტურ საქმიანობაში უკანონოდ ხელშეშლის და სხეულის დაზიანების ფაქტები. სწრაფი და ეფექტიანი გამოძიებით შეაჩეროს მედიაზე გახშირებული თავდასხმები.