ევროპული საბჭოს პრეზიდენტის პირადი წარმომადგენელი კრისტიან დანიელსონი ოპოზიციური პარტიის წარმომადგენლები ხვდება. შეხვედრას ესწრებიან აშშ-სა და ევროკავშირის ელჩებიც.

როგორც შეხვედრის დაწყებამდე „ნაციონალური მოძრაობის“ ერთ-ერთმა ლიდერმა სალომე სამადაშვილმა ჟურნალისტებს განუცხადა, „პოლიტპატიმრების“ - ნიკა მელიას და გიორგი რურუას პატიმრობიდან გათავისუფლება არის პირველი ნაბიჯი, რომელიც მხარეებს შორის რაიმე შეთანხმების მიღწევას შესაძლებელს გახდის, იმიტომ, რომ ეს არის ნდობის აღდგენის მექანიზმი.

„ხაზგასმით მინდა ვთქვა, რომ საპატიმროში გიორგი რურუას დატოვებამ „8 მარტის შეთანხმების“ შემდეგ ქვეყანა მიიყვანა კრიზისამდე სწორედ იმიტომ, რომ ჩვენ ვერ შევძელით მხარეებს შორის იმ ნდობის შექმნა, რომელიც აუცილებელი იყო ამ კრიზისის განსამუხტად. ამიტომ, გიორგი რურუა უნდა გათავისუფლდეს საპატიმროდან.

დიახ, ცხადია, ნიკა მელია უნდა წარმოადგენდეს მოლაპარაკებების მაგიდაზე „ერთიან ნაციონალურ მოძრაობას“. დანარჩენი საკითხები, რომელიც არის ასევე პრინციპულად მნიშვნელოვანი, იმიტომ, რომ ყველა ის საკთხი, რაც არის შესული მიშელის გეგმაში, შეეხება არა რომელიმე ერთი პოლიტიკური პარტიის ან სუბიექტის ინტერესს, არამედ უკავშირდება ქვეყანაში დემოკრატიული პროცესის აღდგენას. ამიტომ ყველა ეს საკითხი არის მნიშვნელოვანი, თუმცა პატიმრების გათავისუფლება შექმნის იმ სივრცეს, რომელიც საჭიროა ამ კომპლექსურ და ძალიან რთულ საკითხებზე საუბრისთვის და შესაბამისი პოლიტიკური შეთანხმების მიღწევისთვის“, - განაცხადა სამადაშვილმა.

ამასთან, კითხვაზე, მიაჩნია თუ არა, რომ „ქართულმა ოცნებამ“ პოზიციები შეცვალა, რადგან აღარ უთქვამთ, რომ „წითელი ხაზი“ სწორედ რიგგარეშე არჩევნებზე გადის, სალომე სამადაშვილი პასუხობს, რომ ზოგადად მოლაპარაკებებზე „წითელი ხაზებით“ მისვლა არაფრის მომცემია.

„დღეს თუ ვინმეს სჭირდება, რომ ეს მოლაპარაკებები იყოს წარმატებული, თუ გავითვალისწინებთ ქვეყანაში შექმნილ უმძიმეს არამხოლოდ პოლიტიკურ, არამედ სოციალურ და ეკონომიკურ კრიზისს და იმას, რომ საქართველოს დღევანდელი ხელისუფლება მთლიანად არის დამოკიდებული დასავლელი პარტნიორების კეთილგანწყობასა და დახმარებაზე, ვფიქრობ, რომ ამ ფონზე თუ ვინმეს ინტერესებში შედის პოლიტიკური მოლაპარაკებების წარმატებით დასრულება, ეს არის „ქართული ოცნება“. შესაბამისად, მათი მხრიდან სწორი იქნება, რომ მოლაპარაკებებზე მოვიდნენ არამხოლოდ ისე, რომ არ არსებობდეს „წითელი ხაზები“, არამედ გადადგან კონკრეტული ნაბიჯები, რაც გახდის შესაძლებელს შეთანხმებას, აქ ვგულისხმობ პილიტპატიმრების გათავისუფლებას“, - განაცხადა სამადაშვილმა.