"რისთვის ალპობთ ამ ხალხს უკვე მრავალი თვეა ციხეში, იმის გამო, რომ "იმ ადამიანს" თავში რაღაც მოელანდა?" , - ასე ეხმაურება საქართველოს მესამე პრეზიდენტი, მიხეილ სააკაშვილი, უკრაინელი მეზღვაურების დაკავებას და სასამართლო პროცესს და აცხადებს, რომ მეზღვაურები ხელისუფლებას უკანონოდ ჰყავს დაკავებული.

მისივე თქმით, თურმე გემზე მის საცვლებსა და წინდებს ეძებდნენ.

"რისთვის ალპობთ ამ ხალხს უკვე მრავალი თვეა ციხეში, იმის გამო, რომ "იმ ადამიანს" თავში რაღაც მოელანდა? სააკაშვილი ამ დროს იჯდა ყველა ეთერში, რანაირად შეიძლებოდა, ერთდროულად ვყოფილიყავი ეთერებში და ერთდროულად ვყოფილიყავი იმ გემზე?

ეძებდნენ თურმე წინდებს, საცვლებს ჩემსას, რაც მომიყვნენ ეს უკრაინელები, მათ, რაც გაიგეს მთელი ამბებიდან. ბოდიშს ვიხდი და როგორ უნდა დაედგინათ ჩემი წინდები და საცვლები იყო დნმ-ის ანალიზის აღებას აპირებდით, თუ როგორ?

ხომ მიხვდნენ, რომ არ ვიყავი, ახლა რატომ ჰყავთ ეს ხალხი ციხეში? - ამიხსნას ვინმემ. არ არის სასაცილო, ვიღაც ადამიანები ტყუილად ჰყავთ ციხეში. მხოლოდ იმის გამო, რომ მე მოველანდე და ასე ხშირად თუ მოგელანდებით, ჩემო ძვირფასებო შეიძლება ცხადში აგიხდეთ და რათ გინდათ ასეთი რაღაცების კეთება და მე ნახევრად ხუმრობით, კი არ ვამბობ, სერიოზულად გეუბნებით - იმდენჯერ მოგელანდეთ უკვე, რომ მოლანდებებმა იცის ცხადში ახდომა, - ამბობს მიხეილ სააკაშვილი "დღის სტუმარში".