"დამთავრებულია თქვენი უკანონო და შეუზღუდავი ბოგინი ამ ქვეყანაში და სანამ დროა, ჩაძირვის პირას მყოფი გემიდან მოასწარით - და ხმელეთზე გადახტით", - მიმართავს მოძრაობა "სირცხვილია" ხელისუფლებას და აცხადებენ, რომ "გემის ჩაძირვის ფონზე, გარშემო ყველაფრის მობღაუჭებას ცდილობენ".

"მივმართავთ ხელისუფლებას, გვესმის, რომ უკვე ყველაფერი დიდ პრობლემას გიქმნით და თქვენი გემის ჩაძირვის ფონზე, გარშემო ყველაფრის მობღაუჭებას ცდილობთ. გვესმის, რომ გეგონათ, ყველაფრის ფულითა და კრიმინალური გავლენებით მართვას შეძლებდით, თუმცა, შეცდით. ისიც გვესმის, რომ შეცდომის აღიარება თქვენი ძლიერი მხარე სულაც არ არის და ის უკანასკნელი წევრიც კი გამოგეცალათ, ვინც რამის გამო თუნდაც ფსევდობოდიშს მოიხდიდა. მაგრამ ხომ არსებობს ის მიჯნა, რომლის მიღმაც თქვენი ქმედებები უკვე სამწუხაროდ სასაცილოა?... ...თქვენი მთავარი მტერი ამ ქვეყანაში თავისუფალი სიტყვაა, ჩვენ კი ბევრნი ვართ და ვისაც არ უნდა მიადგეთ ხვალ, რომელი ტელევიზიის ხელში ჩაგდებაც არ უნდა მოისურვოთ, რომელი ლიდერიც არ უნდა დააკავოთ და რომელი ბავშვიც არ უნდა დააშინოთ, იცოდეთ, რომ უკვე დამთავრებულია თქვენი უკანონო და შეუზღუდავი ბოგინი ამ ქვეყანაში და სანამ დროა, ზემოთ ხსენებული ჩაძირვის პირას მყოფიგემიდან მოასწარით - და ხმელეთზე გადახტით" , - წერს "სირცხვილია".