მზად ვარ, ფიზიკურად დავდგე ჟურნალისტებისა და სიტყვის თავისუფლების დასაცავად!

მზად ვარ, ფიზიკურად დავდგე ჟურნალისტებისა და სიტყვის თავისუფლების დასაცავად! - ირკალი ღლონტი ტვ პირველზე

პოლიტიკა - 16:35, 11 Mar, 2021

1813

იურისტი ირაკლი ღლონტი სასამართლოს განჩნებას ეხმაურება, რომლის მიხედვითაც პროკურატურას უფლება მიეცა ტვ პირველიდან გარკვეული მასალები ამოეღო.

ღლონტის თქმით, აღნიშნული განჩინებით უხეშად ირღვევა სიტყვის თავისუფლება, მოსამართლის ქმედება კი ე.წ. მმაღტველი ძალის მიერაა ნაკარნახევი:

"დიქტატურის გზაზე სწრაფმავალად მდგარი ოლიგარქ ივანიშვილის დანაშაულებრივი რეჟიმის ანტიდემოკრატიულ ნებას, რომ ტრადიციულად თავს დაესხას თავისუფალ და ხელისუფლებისგან დამოუკიდებელ მედიას, განსაკუთრებულ საშიშ შინაარსს სძენს მმართველი პარტიისადმი მორჩილებაში მყოფი სასამართლოს მორიგი ანტიკონსტიტუციური განჩინება, რომლითაც უხეშად ხდება სიტყვის თავისუფლების, როგორც დემოკრატიის ერთ-ერთი მთავარი ფუნდამენტური ღირებულების ხელყოფა.

ტელეკომპანია პირველმა და მათმა წყარომ მოახერხა ხელისუფლების მაღალი პოლიტიკური თანამდებობის პირების სავარაუდო მძიმე დანაშაულში მხილება, რაც გახდა რეჟიმის მხრიდან ტელეკომპანიის წინააღმდეგ ანგარიშსწორების საფუძველი. მიმაჩნია, რომ მოსამართლის გადაწყვეტილება ნაკარნახევია ე.წ. მმართველი ძალის მიერ და წინააღმდეგობაშია, როგორც საქართველოს კონსტიტუციით, ისე საერთაშორისო სამართლით დაცულ დემოკრატიულ უფლებასთან. მოსამართლე კლდიაშვილმა მხედველობაში არ მიიღო ინფორმაციის წყაროს იდენტიფიცირებისგან დაცვის ვალდებულება, მან საგამოძიებო ორგანოებს მისცა ნება ხელჰყონ აბსოლუტური პრივილეგიით დაცული სამართლებრივი სიკეთე, რაც გულისხმობს ჟურნალისტის მიერ საქმიანობის ფარგლებში მოპოვებული ინფორმაციის წყაროს ვინაობის გამჟღავნებისგან დაცვას. მოსამართლის განჩინება ზიანს აყენებს სიტყვის თავისუფლებას, კიდევ ერთხელ ამხელს რეჟიმისა და სასამართლო ხელისუფლების კოლაბორაციის საშიშ ხასიათს და გამოუსწორებელ ზიანს აყენებს ქვეყნის დემოკრატიულ მომავალს.

სოლიდარობას ვუცხადებ ტელეკომპანია პირველს, აქვე გამოვთქვამ მზადყოფნას, რომ საჭიროების შემთხვევაში თანამოაზრეებთან და თანამებრძოლებთან ერთად ფიზიკურადაც მზად ვარ დავდგე ჟურნალისტების და სიტყვის თავისუფლების დასაცავად!" - განაცხადა ღლონტმა.