ევროპარლამენტარმა ვიოლა ფონ კრამონმა საქართველოში არსებულ პოლიტიკურ კრიზისზე ევროპარლამენტში მიმდინარე დებატებისას ისაუბრა და განაცხადა, რომ ორმა ჩრდილოვანმა აქტორმა - სააკაშვილმა და ივანიშვილმაუნდა შეწყვიტონ ქვეყანაში მიმდინარე პროცესებში ჩარევა. მისი თქმით, ევროკავშირმა უნდა იზრუნოს იმაზე, რომ საქართველოს პოლიტიკური კრიზისის განმუხტვას შეუწყოს ხელი:

"საქართველო, აღმოსავლეთ პარტნიორობის ლიდერი ქვეყანა, პოლიტიკური კრიზისის წინაშეა. პოლიტიკოსები ორივე ბანაკიდან უნდა იქნენ დადანაშაულებულები ამ გაუგებრობისთვის. მათ საკუთარი ეგო ქვეყნის ინტერესებზე წინ დააყენეს და თანამშრომლობას პოლარიზაცია არჩიეს. კრიზისის გადასაჭრელად ევროკავშირი ფასილიტაციიდან მედიაციაზე უნდა გადავიდეს, როგორც ჩვენ ეს ახლა გავაკეთეთ. საქართველოს მოსახლეობა უნდა იყოს გამოსავლის ქვაკუთხედი, მათ უნდა გადაწყვიტონ ბედი და დრო მომავალი არჩევნების. ახალი არჩევნები იქნება მხოლოდ გადაუდებელი დახმარება და არა გრძელვადიანი გამოსავალი. სრულიად ახალი საარჩევნო სისტემის გარეშე, ჩვენ დავინახავთ თუ როგორ განმეორდება კრიზისი. სასამართლო სისტემის ხელახალი რეფორმა და მეტი საპარლამენტო კონტროლი ოპოზიციისთვის უნდა იყოს პოლიტიკური პრიორიტეტი. ორივე მავნებელმა ჩრდილოვანმა აქტორმა - სააკაშვილმა და ივანიშვილმა უნდა შეწყვიტონ პროცესებში შემდგომი ჩარევა. ევროკავშირმა უნდა იმოქმედოს საქართველოში. ჩვენ არ შეგვიძლია არ ვიყოთ იქ, რეგიონში მიმდინარე კიდევ ერთი კრიზისის დროს,"- განაცხადა ვიოლა ფონ კრამონმა.

მოგვიანებით მან თავის გამოსვლასთან დაკავშირებით სოციალურ ქსელ ტვიტერში გააკეთა განმარტება და აღნიშნა, რომ საქართველოის მესამე პრეზიდენტის მიხეილ სააკაშვილის ყოველი ხმის ამოღება ქვეყანაში მიმდინარე პოლიტიკურ არეულობას აღრმავებს:

"ყოველ ჯერზე, როდესაც სააკაშვილი რამეს იტყვის, ამბობს, ქვეყანა კიდევ უფრო ღრმა პოლიტიკურ არეულობაში ექცევა. ეს არის არა კონსტრუქციული, არამედ მხოლოდ პროვოკაციული მიდგომა. სწორედ ამიტომ ვახსენე ისინი (მიხეილ სააკაშვილი და ბიძინა ივანიშვილი) ერთ წინადადებაში", - აღნიშნა ვიოლა ფონ კრამონმა.