"ნუ ჩამეჩრებით სიტყვაში თუ შეიძლება, თუ გაინტერესებთ რას ვიტყვი, მომისმინეთ და ვიტყვი. თუ არადა, თქვენი კითხვები არ მაინტერესებს მე. მე ვამბობდი სიტყვას და შემაწყვეტინეთ", - ამ სიტყვებით მიმართა ჭყონდიდის მიტროპოლიტმა სტეფანემ ჟურნალსიტებს.

როდესაც ჟურნალისტმა სცადა მიტროპოლიტისთვის ეთქვა, რომ მის წასვლას მისივე მოწინააღმდეგეები ითხოვენ, მან უპასუხა, რომ ესენი არა მისი, არამედ ეკლესიის მოწინააღმდეგეები არიან და შემდეგ ამ ფორმით მიმართა.

მიტროპოლიტი სტეფანე აცხადებს, რომ ეპარქიის დატოვება არ აპირებს.

"საინტერესო კითხვებს სვამთ. აი, რატომ გაინტერესეთ ასეთი კითხვების დასმა ვერ გავიგე, რა - "აპირებთ თუ არა დატოვებას" - არაფერს არ ვაპირებ, არ ვთქვი მე გუშინ? რა მაქვს დასატოვებელი კაცო", - განუცხადა მან ჟურნალისტებს.

მისი თქმით, რამდენიმე სასულიერო პირმა, რომელიც "არაეკლესიური წესებით" ცხოვრობს და მოქმედებს, შეკრიბა ხალხი, "შეთქმულება მოაწყვეს" მაშინ, როცა მას სამღვდელოების კრება ჰქონდა. მისი თქმით, იქ პრესა და მრევლი არ უნდა ყოფილიყო, რადგან მათ აქვთ წესი ერთმანეთთან ილაპარაკონ.