"მედიაცენტრ მთავარის" გუშინ გავრცელებული ინფორმაციის თანახმად, ზაქათალას რაიონში სოფელ ფალდარლოში ისტორიული მნიშვნელობის საგანძური აღმოაჩინეს. გავრცელებული ცნობით, აღმოჩენის შესახებ მაშინ გახდა ცნობილი, როდესაც ადგილობრივი მიწას ხნავდა და მოულოდნელად ნიადაგი ჩაინგრა. სიღრმისეულად ამოთხრის შემდეგ, ადგილზე 12 ტონამდე ოქრო, ფაეტონი და გარდაცვლილთა ნეშტებია აღმოჩენილი.

ამ დროისთვის აღმოჩენის წერტილში ქართველი და აზერბაიჯანელი არქეოლოგები მუშაობენ, ტერიტორია შემოსაზღვრულია და ადგილზე არავის უშვებენ.

საზოგადოებაში გაჩნდა მოსაზრება, რომ ეს აღმოჩენა, შესაძლოა თამარ მეფის საფლავის გასაიდუმლოებულ ისტორიას უკავშირდებოდეს.

ისტორიკოს ჯაბა სამუშიას განმარტებით, შეუძლებელია აღმოჩენა თამარ მეფის საფლავთან რაიმე კავშირში იყოს. მისი განმარტებით, არც ერთ ისტორიულ წყაროში არ არის მითითებული, რომ თამარი გარდაცვალების დროს ამ ტერიტორიის სიახლოვეს დაკრძალეს:

"თამარ მეფესთან დაკავშირებით იმდენი ჭორი და ლეგენდა არსებობს, რომ ეს ერთ-ერთ ასეთ ლეგენდათა რიგში უნდა ჩადგეს. რაც შეეხება საფლავის ადგილმდებარეობას, არანაირი კავშირი თამარ მეფის დასაფლავებასთან მაგ რეგიონს არ ჰქონდა. არც ერთ ქართულ წყაროში არსად არ არის აღნიშნული, რომ თამარ მეფე გარდაცვალებისას აღნიშნულ რეგიონში იმყოფებოდა. ამ თვალსაზრისით ცალსახაა, რომ თამარ მეფე იქ არ დაუკრძალავთ. ვერ გეტყვით კონკრეტულად, რა არის აღმოჩენილი ჰერეთში, რადგან ახლა მიმდინარეობს არქეოლოგიური გათხრები.

ქართულ წყაროებში ზედმიწევნით არის აღწერილი, სად გარდაიცვალა, სად მოხდა პირველად მისი დაკრძალვა, მერე როგორ გადაასვენეს სხვა ადგილზე. ის ადამიანები, რომლებიც უშუალო მონაწილეები იყვნენ თამარის დაკრძალვის პროცესიის, აღწერენ ამ მოვლენას - წერია, რომ იანვარში გარდაიცვალა და რადგან იყო ზამთარი და დიდთოვლობა, პროცესია ვერ გადავიდა ლიხზე და პირველად სვეტიცხოველში დაკრძალეს, შემდგომ უკვე, გაზაფხულზე მოხდა მისი გადასაფლავება გელათის მინდვრებში. ეს ყველაფერი იმ ადამიანების მიერაა აღწერილი, ვინც უშუალოდ პროცესს ესწრებოდა. გამომდინარე აქედან, იმის თქმა, რომ საზღვრისპირა ზოლში დაკრძალეს, დიდი ჭორია.

თუმცა, მეორეს მხრივ, საინტერესოა ის აღმოჩენა, რაც ჰერეთშია - არის თუ არა ის საქართველოს ისტორიისა და კულტურის ნაწილი. დაველოდოთ არქეოლოგიურ სამუშაოებს, ვნახოთ, რა სიახლე იქნება ჩვენი ისტორიისთვის" - განაცხადა ჯაბა სამუშიამ.