სკანდალურ სიუჟეტთან დაკავშირებით პარლამენტში შესული პარტია "მოქალაქეები" დროებითი საგამოძიებო კომისიის შექმნის ინიციატივით გამოდის.

ალეკო ელისაშვილი და ლევან იოსელიანი ოპოზიციას მოუწოდებენ, აღნიშნული ინიციატივის რეალიზებაში დაეხამრონ, რადგან მათი ხმა საკმარისი არ არის საკითხის ინიცირებისთვის. რეგლამენტის თანახმად, საკითხის ინიცირებას 30 ხმა სჭირდება, ხოლო კომისიის შექმნაზე გადაწყვეტილების მიღებას 50 ხმა:

"ჩვენ თავზარდამცემი ჩანაწერები მოვისმინეთ. გავიდა რამდენიმე დღე და არ გვაქვს პასუხი მთავარ კითხვებზე - არის თუ არა ჩანაწერები ავთენტური, იკავებდნენ თუ არა მაღალ თანამდებობას ჩანაწერებში მოსაუბრე ადამიანები ჩანაწერების გაკეთების დროს და, შესაბამისად, იყენებდნენ თუ არა სახელისუფლო მექანიზმებს ადამიანებზე ზეწოლისთვის. ეს ყველაზე მნიშვნელოვანი კითხვებია, რაზეც წესით გამოძიებას პასუხი უნდა ჰქონდეს. ჩვენ რომ ნორმალური ქვეყანა ვიყოთ, ამდენ ხანს გამოძიება დაწყებული იქნებოდა. ამის ნაცვლად, ჩვენ პოლიტიკურ ინსინუაციებს და სხვადასხვა სტუდიაში განხილვებს ვხედავთ. არის პოლიტიკური მარჩიელობა, ნაცვლად იმისა, რომ მკაფიო პასუხები გამოძიებისაგან გვქონდეს.

პროკურატურამ შესაძლოა, გამოძიება დაიწყოს კიდეც, მაგრამ მის მიმართ ნდობა ობიექტური მიზეზების გამო არის ნულს ქვემოთ", - განაცხადა ალეკო ელისაშვილმა.