ფრაქცია "ქართული ოცნების" თავმჯდომარე მამუკა მდინარაძე ტვ პირველის ეთერში გასულ ანონსს გამოეხმაურა, სადაც ბერა ივანიშვილისა და ირაკლი ღარიბაშვილის სატელეფონო საუბრის ფარული ჩანაწერის ნაწყვეტი გავიდა და რომელშიც სხვადასხვა პირების დასჯაზე, მათ შორის არასრულწლოვანის ფიზიკურად გასწორებაზეა საუბარი.

ოცნების გუნდის წევრის შეფასებით, ჩანაწერი ფაბრიკაციაა, რომელიც საზოგადოების მიმართ საინფორმაციო-ტერორისტული აქტების განხორციელების მიზანს ემსახურება. მისი თქმით, ეს არის "კაგებეშნიკური" მეთოდით შენახული და დაჭრილი ჩანაწერი:

"თქვენ ალბათ გაგიგიათ და მთელმა მსოფლიომ იცის, რას ნიშნავს ყვითელი პრესა. სამწუხაროდ, საქართველოში გამოიკვეთა წითელი პრესის კონტურები და ნიშნები, სადაც ძველი საბჭოთა „კაგებეშნიკური“ მეთოდებით, ინახავენ წლების განმავლობაში რაღაც სხვადასხვა ჩანაწერს, შემდეგ ამონტაჟებენ, ჩეხავენ, კრავენ, აკეთებენ ფაბრიკაციას, საკუთარი საზოგადოების მიმართ საინფორმაციო-ტერორისტული აქტების განხორციელების მიზნით. ეს არის საინფორმაციო ტერორიზმი, განხორციელებული წითელი პრესის მიერ და მიმართულია ქართული საზოგადოების წინააღმდეგ. ეს ძალიან სამწუხაროა. ყველამ ერთად უნდა შევძლოთ, რომ ამ წითელ ხაზებს მიღმა, „კაგებეშნიკური“ მეთოდების გამორიცხვით და საზოგადოებრივი კონსენსუსის შექმნით, რაღაც საკითხზე მაინც, შევძლოთ, რომ ყველამ ერთად დავგმოთ ფაბრიკაციები, ფარული ჩანაწერები და ამით ადამიანების დისკრედიტაცია. ეს უნდა ჩავაბაროთ რამენაირად წარსულს, რომელ მხარესაც რა პოლიტიკური მიზნებიც არ უნდა გააჩნდეს" - განაცხადა მამუკა მდინარაძემ.