ოცნების დეპუტატი სოზარ სუბარი ტვ პირველის წინააღმდეგ ღია იერიშზე გადადის - მის მიერ სოციალური ქსელით გავრცელებულ ინფორმაციაში ნათქვამია, რომ აღნიშნული მედიის მხრიდან გავრცელებული ინფორმაციის შემდეგ სიუჟეტის გმირის, ქართული ოცნების აქტივისტის ბებია ნერვიულობის ნიადაგზე გარდაიცვალა:

"სააკაშვილის შავი არქივი

მორიგი სიბინძურე გამოაგდეს პარტიული ტელევიზიის მუშაკებმა - უკრაინიდან მიღებული დავალებით და შემონახული სიყალბის ტირაჟირებით ცდილობენ საზოგადოების მოტყუებას. ეს და კიდევ არაერთი ფალსიფიცირებული ჩანაწერი ჯერ კიდევ ქართული ოცნების ხელისუფლებაში მოსვლამდე დაამზადეს მაშინდელი რეჟიმის მონებმა და როგორც ჩანს, არც მომავალში დაიხევენ უკან მსგავსი სიბინძურეების ტირაჟირებისგან. ჩვენ მაშინვე გვქონდა ინფორმაცია, რომ სააკაშვილის დავალებით ამონტაჟებდნენ სხვადასხვა შინაარსის ჩანაწერებს და ესეც ერთ-ერთი მათგანია. თუმცა, რა უნდა გაგვიკვირდეს იმ ტელევიზიისგან, რომელმაც ორი დღის წინ ადამიანს მათი პარტიის ოფისის დარბევა დააბრალა, რასაც მოხუცი ბებიის გარდაცვალება მოყვა.

დაბოლოს, რა გავიგეთ ამ ჩანაწერიდან?! კიდევ ერთხელ გავიგეთ, რაც მანამდეც ვიცოდით, ვინ იყო ფარული ჩანაწერების შემოქმედი და ვინ ფლობს ამ შავ არქივს" - წერია სუბარის მიერ გავრცელებულ პოსტში.

საქმე ეხება ფარნა მახოხაშვილს, რომლის კავშირზეც საუბრობდა ტვ პირველი, როდესაც გორში ნაციონალური მოძრაობის ოფისი დაარბიეს. მახოხაშვილმა პოსტიც გაავრცელა ამის შესახებ, თუმცა, ირკვევა, რომ მას ბებია მანამდე გარდაეცვალა, სანამ ტვ პირველი აღნიშნულის შესახებ ისაუბრებდა.

სუბარის პოსტს ტვ პირველი ეხმაურება და განცხადებას ტყუილს უწოდებს და აღნიშნულ განცხადებებს არხის დისკრედიტაციის მიზნით განხორციელებულ თავდასხმას უწოდებს.

ჟურნალისტის კითხვაზე, მონაწილეობდა თუ არა გორის ენმ-ს ოფისზე თავდასხმაში, მახოხაშვილი აცხადებს, რომ იქ ვერ იქნებოდა, რადგან მიცვალებული ჰყავდა სახლში. გამოდის, რომ ქალი უკვე გარდაცვლილი იყო, როდესაც ნაციონალური მოძრაობის ოფისი დაარბიეს, შემდეგ კი ეს ამბავი ტვ პირველმა გააშუქა.