ცესკო-ში განხორციელებულ რეორგანიზაციას ოპოზიცია ეხმაურება და შტატების დამატების ფაქტს არჩევნების წინ ატეხილ აჟიოტაჟს უწოდებს.

"ევროპული საქართველოს" წევრის ლევან თარხნიშვილის განცხადებით, ის ადამიანები, რომლებიც მათი ყურმოჭრილი მონები არ გახდნენ, მარტივად ჩამოიშორეს და ისინი დაიყენეს გვერდით, ვინც მათი პარტიული მითითებების შესრულებაში უბადლოა:

"ჩამოაშორეს პრაქტიკული ინსტრუმენტები იმ ადამიანებს, ვისაც არ ენდობიან, იმიტომ რომ, არ არიან მათი ყურმოჭრილი მონები და გადააბარეს იმათ, ვინც უსიტყვოდ ასრულებს პარტიის მითითებებს", განაცხადა თარხნიშვილმა.

ცესკო-ს ყოფილი თანამშრომლის აკაკი ხუსკივაძის განმარტებით, ამ რეოგანიზაციით ის ადამიანები დააწინაურეს, რომლებიც 2020 წლის 31 ოქტომბრის არჩევნებზე "კარგად მოიქცნენ:

"ცესკო-ში მანამდეც იყო ე.წ. "ოდეერი", მაგრამ ახლა ცალკე თანამდებობა იქნება გამოყოფილი მისთვის. იზრდება ზოგიერთი თანამშრომლის გარკვეული ფუნქციები და ზოგ დეპარტამენტს ართმევენ ფუნქციებს და უმატებენ იმ დეპარტამენტებს, რომლებიც 2020 წლის არჩევნებზე "კარგად მოიქცნენ", - განაცხადა ხუსკივაძემ.

"დიდი ფორიაქია ატეხილი, არამხოლოდ ცესკო-ში, არამედ მთლიანად ხელისუფლებაში. გასაგებია, რომ მზადება მიდის სხვადასხვა მიმართულებით და ახლა ცესკო-ში ასე ფარულად გამოცხადებული რეორგანიზაცია, ისე დაიწყეს და დაამთავრეს, რომ კაცი შვილს არ გაუგია, ეს მეტყველებს მხოლოდ იმაზე, რომ მართლაც კუთხეში არიან მიმწყვდეულები და ეძებენ გამოსავალს შექმნილი ვითარებიდან. რაც არ უნდა რეორგანიზაციები ატარონ, ეს ნამდვილად არ უშველის საქმეს" - განაცხადა ენმ-ს წევრმა ზაალ უდუმაშვილმა.

შეგახსენებთ, რომ ცესკო-ში გასაიდუმლოებული რეორგანიზაცია ჩატარდა და შტატები დაემატა, ისე, რომ ამის შესახებ თანამშრომლები საქმის კურსში მხოლოდ მაშინ ჩააყენეს, როდესაც ყველაფერი დამთავრებული იყო.