28 წლის ყოფილი სამხედრო ზაურ კომახიძე, რომელიც ავღანეთის სამშვიდობო მისიის შესრულებისას აფეთქების დროს მძიმედ დაშავდა, ჯერ თავდაცვის სამინისტრომ ჯარიდან გამოუშვა, რათა მისი მკურნალობის ხარჯები არ აენაზღაურებინა, ახლა კი სახელმწიფომაც დაივიწყა და უსახსრობის გამო წამალს ვერ ყიდულობს.

კომახიძის თქმით, მას დაზიანებული აქვს ხერხემალი და თავისუფლად გადაადგილება არ შეუძლია:

"დანაღმული მანქანა დაგვეჯახა, რის შედეგადაც დამიზიანდა ხერხემალი. სულ 4 აფეთქება მოგვივიდა. დანიშნული წამლების ნახევარი მაქვს ნაყიდი, იმიტომ, რომ არ მაქვს საშუალება და ვერ ვყიდულობ წამლებს. თავდაცვის სამინისტრომ, თავის თავზე უნდა აიღოს პასუხისმგებლობა სრულად. საქართევლოში რომ დაბრუნდები, ვითომ ჯარისკაცი არ ყოფილხარ, ისეთ მდგომარეობაში გაყენებენ, ისე გიშვებენ ჯარიდან. არავის არ შემოუღია ჩემი კარი 3-4 წლის განმავლობაში. როგორც ავღანეთში დაჭრილი სხვა სამხედროების შემთხვევაში ხდება, მეც მინდა, რომ გერმანიაში გადამაფრინონ და რეაბილიტაციის სრული კურსი გავიარო", - ამბობს, ჯარისკაცი, ზაურ კომახიძე.

ზაურ კომახიძე, საქართველოს შეიარაღებული ჯარების სენაკის მე-4 ქვეითი ბრიგადის ჯარისკაცი იყო. ის სამშვიდობო მისიის ფარგლებში სამჯერ იმყოფებოდა ავღანეთში.