გუშინ პარლამენტში "მინისტრის საათის" ფარგლებში შს მინისტრმა ვახტან გომელაურმა მოსმენაზე წამოაყენა ინიციატივა, რომ დეპარტამენტის უფროსების და მათი მოადგილეების პირადი ინფორმაცია არ უნდა იყოს ყველასთვის ხელმისაწვდომი.

ოპოზიციამ ეს ინიციატივა შეაფასა, როგორც დემოკრატიული პრინციპების ხელის შეშლა და მავნებლური წინადადება. ხელისუფლების ოპონენტების განმარტებით, დეკლარაციის არსი სწორედ იმაში მდგომარეობს, რომ ის უნდა იყოს საჯარო:

"პირდაპირ გეტყვით, რომ სულელური და ძალიან მავნებლური ინიციატივაა", - განაცხადა ენმ-ს წევრმა ხატია დეკანოიძემ.

"ვისაც ასეთი ინციატივა თავში მოსდის, ნიშნავს, რომ არანაირი დეკრატიული ინსტინქტები არ გააჩნია. დეკლარაციის მთელი არსი არის ის, რომ საჯარო იყოს. საზოგადოებამ იცოდეს, შემოსავლები საიდან აქვთ, რა ქონებას ფლობენ საჯარო მოხელეები და იცოდეს რამდენადაა კორუფციის საფრთხეები. ვინც ამაზე საუბრობს, არგუმენტად მოჰყავს ხოლმე, პირადი ცხოვრების ხელშეუხებლობა არის სრული ბოდვა", - აღნიშნა "ევროპული საქართველოს" წევრმა სერგი კაპანაძემ.

გომელაურის გარდა, საპარლამენტო უმრავლესობის წევრი, კახა კახიშვილიც, გამოვიდა ინიციატივით პოლიციელების, სპეცრაზმელების და ოპერატიული მუშაკების დეკლარაციების დაშტრიხული ფორმით გამოქვეყნებასთან დაკავშირებით. როგორც კახიშვილმა თქვა, ღია სივრცეში დეკლარაციების სრულად გამოქვეყნება ამ ადამიანებს და მათ ოჯახის წევრებს საფრთხეს უქმნის.