9 მარტს ევროპარლამენტში საქართველოში არსებულ პოლიტიკურ კრიზისთან დაკავშირებით დებატები გაიმართება, რომელიც განსახილველ თემებში ერთ-ერთ პრიორიტეტულ ადგილს იკავებს.

დებატებს ევროკავშირის საგარეო ურთიერთობების უმაღლესი წარმომადგენელი ჟოზეფ ბორელი დაესწრება.

ოპოზიციის შეფასებით, ეს კიდევ ერთი გზავნილი იქნება ხელისუფლებისთვის. ენმ-ს წევრის სალომე სამადაშვილის განცხადებით, იმ შემთხვევაში, თუ შეთანხმება ვერ მოხდება, შესაძლოა, ევროპარლამენტმა შესაბამისი რეზოლუცია მიიღოს:

"ეს არის ერთ-ერთი მაჩვენებელი იმის თუ რაოდენ შეშფოთებულები არიან ევროპარლამენტარები. ისინი ასევე განიხილავდნენ რეზოლუციის მიღების საკითხს, ერთადერთი მიზეზი რატომაც შეიკავეს თავი რეზოლუციაზე მსჯელობისგან არის, ის რომ შანსი მისცენ მიშელის მიერ დაწყებულ მოლაპარაკებას. თუ ეს პროცესიც ჩაიშალა, შემდეგი ეტაპი ცხადია იქნება ევროპარლამენტის მიერ შესაბამისი რეზოლუციის მიღება", - განაცხადა სამადაშვილმა.

ევროპარლამენტში დებატების ინიციატორები იყვნენ "ევროპის სახალხო პარტია", "მწვანეები", "ლიბერალებისა და დემოკრატების ალიანსი" და "სოციალისტები".