ენმ-ს წევრის ზაალ უდუმაშვილის განცხადებით, მას ხელისუფლებისგან მოლაპარაკებების მოლოდინი არ აქვს. უდუმაშვილის განმარტებით, 16 მარტს საქართველო-ევროკავშირის ასოცირების საბჭოს შეხვედრაზე კონკრეტული შედეგის გარეშე ღარიბაშვილის ჩასვლა მწვავე მესიჯი იქნება ევროპელი პარტნიორებისთვის:

"არანაირი მოლოდინი არ მაქვს. დღესაც, პრემიერ-მინისტრი მთავრობის სხდომაზე ისე გამოვიდა, რომ საერთოდ ერთი სიტყვაც არ დაუძრავს მოლაპარაკებების შესახებ. შესაბამისად, ასეთ პოზიციაში ყოფნა ძალიან ცუდი იქნება ამ ხელისუფლებისთვის, იმიტომ რომ 16 მარტს შედეგს ელოდებიან ბრიუსელში თბილისიდან. კონკრეტული შედეგის გარეშე ჩასვლა ეს იქნება ძალიან მძიმე მესიჯი ჩვენი ევროპელი პარტნიორებისთვის.

ნიკა მელიას გათავისუფლება არის უმნიშვნელოვანესი, რომ დაიწყოს მოლაპარაკების პროცესი. მოლაპარაკებათა მაგიდასთან რომ დავსხდეთ, ამისთვის გარკვეული წინაპირობები უნდა შესრულდეს. თუ არ შესრულდა ეს წინაპირობები, მოლაპარაკებებსაც აზრი არ ექნება. ამიტომ მოლაპარაკებები დაიწყება თუ არ დაიწყება, ეს არის დღეს ხელისუფლების ხელში და არა ოპოზიციის ხელში. ხელისუფლებამ უნდა გადადგას ნაბიჯი. მკვეთრი ნაბიჯები იქნება იმ შემთხვევაში, თუ მოლაპარაკებები არ შედგა და ხელისუფლება დარჩა იმ პოზიციაზე, რომელზეც ახლა დგას.

რაც უფრო დრო გადის პლებისციტის იდეა მით უფრო კარგავს აზრს, რადგან პლებისციტი მაშინ იყო შეთანხმების საგანი, როდესაც ჩვენ მას ვთავაზობდით ხელისუფლებას ჯერ კიდევ რამდენიმე თვის წინ. ახლა თუ დროულად არ იქნა მიღებული გადაწყვეტილებები, აღარც პლებისციტს ექნება აზრი და არანაირ შემოვლით გზებს. ჩვენი მთავარი მოთხოვნა არის ახალი არჩევნები. ამ ახალ არჩევნებამდე რა გზით მივალთ, ეს შეიძლება იყოს მოლაპარაკებების საგანი, მაგრამ ახალი არჩევნები რომ არ გადაიხედება ეს ფაქტია",- განაცხადა ზაალ უდუმაშვილმა.

შეგახსენებთ, რომ ბრიუსელში 16-17 მარტს საქართველო-ევროკავშირის ასოცირების საბჭოს მორიგი შეხვედრა გაიმართება.