სხვადასხვა საერთაშორისო კვლევებითა და ანგარიშებით საქართველოს დემოკრატიული ინდექსი, არა ერთი ასპექტის გათვალისწინებით, ქვემოთ იწევს, მით უფრო, რაც ქვეყანა პოლიტიკურ ჩიხში შევიდა და არადემოკრატიული პროცესები პარტნიორების შეშფოთების მიზეზი გახდა.

ამ ყველა სიკეთეს Freedom house-ის ანგარიში "თავისუფლება მსოფლიოში 2021"-ც დაემატა, სადაც ქვეყანაში არსებულ საარჩევნო სისტემაზე, სასამართლოს მიკერძოებულ ფაქტებზე, ოლიგარქიულ მმართველობასა და მედიის მიმართ უსამართლო დამოკიდებულებაზეა საუბარი:

"ოქტომბრის საპარლამენტო არჩევნებში ქართულმა ოცნებამ 90 მანდატი მიიღო, მათ შორის 30 მაჟორიტარული, გაერთიანებულმა ოპოზიციამ ნაციონალური მოძრაობის ლიდერობით კი - 36, მათ შორის ყველა პროპორციული სისტემით. დარჩენილი ადგილები 7-მა პატარა პარტიამ დაიკავა. დამკვირვებლებმა, მათ შორის ეუთო/ოდირმა არჩევნები კონკურენტულად მიიჩნიეს, თუმცა რამდენიმე დარღვევა დააფიქსირეს - მათ შორის ადმინისტრაციული რესურსის გამოყენება, ხმების ყიდვა, დამკვირვებელთა საქმეში ჩარევა, ძალადობა, საჯარო მოხელთა დაშინება", - წერია ანგარიშში.

კვლევაში ნათქვამია ის, რომ შეკრების თავისუფლება ხშირად დაცულია, მაგრამ არა ყოველთვის, რადგან პოლიცია დემონსტრანტებს პერიოდულად აკავებს და მათზე გადამეტებულ ძალადობას ახორციელებს. აქვე მოყვანილია ცესკო-სთან წყლის ჭავლით დაშლის მაგალითი.

განსაკუთრებით აღსანიშნავია მედიის დამოუკიდებლობის პრობლემა და მიკერძოებული მენეჯმენტი. ანგარიშში ისიც არის ნათქვამი, რომ "რუსთავი 2"-ის ხანგრძლივ დავას საეჭვო დასასრული ჰქონდა, რადგან ტელეკომპანია საბოლოოდ მმართველ გუნდთან დაახლოებულ პირს გადაეცა.