ჩხრეკა საგარეო საქმეთა მინისტრის ყოფილი მოადგილის სახლში - დააკავებენ თუ არა ე.წ. კარტოგრაფების საქმის მთავარ მოწმეს

პოლიტიკა - 13:21, 03 Mar, 2021

1147

ე.წ. არტოგრაფების საქმის ერთერთი მთავარი მოწმის, საგარეო საქმეთა მინისტრის ყოფილი მოადგილის, გიორგი მანჯგალაძის ბინა გაჩხრიკეს. ადვოკატის ინფორმაციით, სამართლდამცველებმა გუშინ, ჩხრეკის შედეგად მეხსიერების ბარათი და კომპიუტერული ტექნიკა წაიღეს. ზაზა სუხიშვილის თქმით, საქმეში არ არსებობს ისეთი მტკიცებულებები, რომელიც მის მიმართ სამართლებრივი დევნის საფუძველი გახდება.

"ჩხრეკა ჩატარდა და ინფორმაციის მატარებელი, რაც არის ხოლმე მეხსიერების ბარათი და კომპიუტერი იქნა ამოღებული. სამსახურიდან არაფერი წაუღიათ, სამსახურში გამოძიებისთვის საინტერესოს არაფერს ინახავს.

ბატონი გოგი არ დაუბარებიათ, დამატებით რამე ინფორმაცია არ უთქვამთ ჩვენთვის. ჯერ არ არის ისეთი მონაცემები და ისეთი მტკიცებულებები შეგროვილი, რომ მისი სტატუსი შეიცვალოს. დღეს არის მოწმის სტატუსით ამ საქმეში", - თქვა ზაზა სუხიშვილმა.

ამასთან საქმეზე კომენტრაი გააკეთა ე.წ კარტოგრაფების საქმეზე ბრალდებული, ივერი მელაშვილის ადვოკატმა. ედუარდ მარიკაშვილის თქმით, სახალხო დამცველის ანგარიშით, კიდევ ერთხელ დადასტურდა, რომ საქმე პოლიტიზირებულია და ნებისმიერი სხვა საგამოძიებო მოქმედება პოლიტიკური მოტივით იქნება.

"გახდა ცნობილი, ძალიან მნიშვნელოვანი დოკუმენტის შესახებ. ეს არის სახალხო დამცველის სასამართლო მეგობრის მოსაზრება, რომელიც სახალხო დამცველმა სასამართლოს წარუდგინა. ამ დოკუმენტში ერთ-ერთი უმნიშვნელოვანესი რაც არის, იქ პირდაპირ არის საუბარი იმაზე, რომ კარტოგრაფების საქმეზე მართლმსაჯულება ხორციელდება, არა მართლმსაჯულების მიზნებიდან გამომდინარე, არამედ მას აქვს ძალიან დიდი პოლიტიკური შინაარსი, რაც ფაქტიურად უკანონოდ აქცევს ყველა ქმედებას ბრალდებულების მიმართ", - აცხადებს ედუარდ მარიკაშვილი.

შეგახსენებთ, ივერი მელაშვილს და ნატალია ილიჩოვას გამოძიება საქართველოს საწინააღმდეგო მოქმედებას ედავება. პროკურატურა ბრალდებულებს სადემარკაციო კომისაში მუშაობისას საქართველოს საწინააღმდეგო რუკებით მუშაობაში ადანაშაულებს.