ენმ-ს წევრის თიკა ბოკუჩავას განცხადებით, დისონანსია ხელისუფლების და კერძოდ, ღარიბაშვილის მიერ გაჟღერებულ გზავნილებსა და მათ მოქმედებებს შორის, როდესაც ისინი კვლავ უკანონოდ აგრძელებენ მშვიდობიანი პროტესტანტების დაკავებას. მისი განმარტებით, ღარიბაშვილი და მისი უფროსი დროულად უნდა ჩამოყალიბდნენ, საით მიჰყავს ქვეყანა - რუსული ავტორიტარიზმისკენ თუ ევროკავშირისკენ:

"იგეგმება აქცია მთავრობის ადმინისტრაციასთან, სასამართლოს შენობასთან, პოლიციის შენობასთან, რადგან ეს არის ყველა ის ინსტიტუტი, რომელიც არ ასრულებს მის კანონიერ უფლებამოსილებას, მიტაცებული ჰყავს ივანიშვილს და იყენებს უკანონო მიზნებისთვის, მათ შორის პოლიტიკური დევნისთვის, პოლიტიკური ოპონენტების დაკავებისთვის და ამით საფრთხის ქვეშ აყენებს ჩვენი ქვეყნის დემოკრატიულ განვითარებას და ევროატლანტიკურ მისწრაფებებს. როგორც ხედავთ, აქცია არის მშვიდობიანი და ასე იქნება მომავალშიც. ის მიზნად ისახავს "ქართული ოცნების" ე.წ. დეპუტატებს, რომლებიც გაყალბებული არჩევნების შედეგად იკავებენ იმ სავარძლებს, რომელშიც კომფორტულად არიან მოთავსებული, გავაგონოთ პროტესტის ხმა, ხალხის ხმა და შევასმინოთ, რომ მხოლოდ და მხოლოდ ივანიშვილის მონური მორჩილება არ შედის პოლიტიკოსის და კანონმდებლის ინტერესში. ის რეალურად უნდა წარმოადგენდეს ხალხის ხმას და ნებას საკანონმდებლო ორგანოში.

დისონანსია ხელისუფლების და კერძოდ, ღარიბაშვილის მიერ გაჟღერებულ გზავნილებსა და მათ მოქმედებებს შორის, როდესაც ისინი კვლავ უკანონოდ აგრძელებენ მშვიდობიანი პროტესტანტების დაკავებას. ამიტომ ღარიბაშვილი და მისი უფროსი დროულად ჩამოყალიბდნენ საით მიჰყავთ ეს ქვეყანა - რუსული ავტორიტარიზმისკენ, სადაც მშვიდობიან მოქალაქეებს აკავებენ, თუ ევროკავშირისკენ, რაც არის ქართველი ხალხის არჩევანი, რომლის დასაცავადაც ასე ღიად საუბრობენ ჩვენი დასავლელი პარტნიორები“, - განაცხადა ბოკუჩავამ.

შეგახსენებთ, რომ პარლამენტის ყველა შესასვლელთან ოპოზიციური პარტიების ლიდერები სამოქალაქო აქტივისტები არიან შეკრებილნი. ისინი შენობის პიკეტირებას ახდენენ. ადგილზე მობილიზებულია უამრავი სამართალდამცველი. პოლიციამ უკვე 7 აქტივისტი დააკავა, რომლებიც ოცნების დეპუტატებს "მონას" შეძახილით აცილებდნენ ე.წ. სირცხვილის დერეფანში.