ფრაქცია "ქართული ოცნების" თავმჯდომარის მამუკა მდინარაძის განცხადებით, ოპოზიციის მიერ პარლამენტის პიკეტირება დესტრუქციულია, მით უფრო იმის ფონზე, რომ გუშინ ევროსაბჭოს პრეზიდენტი შარლ მიშელი მხარეებს მოლაპარაკებისა და კონსტრუქციისკენ მოუწოდებდა. მისი განმარტებით, ოცნების გუნდი მზად არის დიალოგი გააგრძელოს ოპოზიციასთან:

"გუშინ, მთელი დღის განმავლობაში, შარლ მიშელი ყველა მხარეს არწმუნებდა, რომ უნდა გადასულიყო მოლაპარაკებები კონსტრუქციულ ფორმაში და დღეს ჩვენ ამის საპასუხოდ ვნახეთ მათი ოპოზიციის უკიდურესად დესტრუქციული მოქმედება. პირობის დარღვევის პირველი პრეცედენტი უკვე ვნახეთ დღევანდელი პიკეტირების მცდელობის სახით. ეს არ არის სწორი საქციელი. ეს მოლაპარაკების პოზიტიურ შედეგთან ვერ მიგვიყვანს. ეს ნიშნავს უპასუხისმგებლობას ერთი მხრიდან.

ჩვენ, ამის მიუხედავად, მზად ვართ, ბოლომდე მივყვეთ მოლაპარაკების პროცესს, რომ სახელმწიფოებრივი და საზოგადოებრივი ინტერესებიდან გამომდინარე, დაიდოს პოზიტიური შედეგი. მაგრამ, თუ გაგრძელდება მათი მხრიდან დესტრუქცია და ერთი რაციონალური ნაბიჯი მაინც ვერ გადმოიდგმება, შეხების წერტილები იქნება ნაკლები. თუკი ისინი კარგი გაგებით იძულებული გახდებიან, რომ ერთი რაციონალური ნაბიჯი მაინც გადმოდგან, ამ შემთხვევაში ძალიან მარტივია მედიაციის წყალობით შეთანხმების მიღწევა", - განაცხადა მამუკა მდინარაძემ.