"ერთიანი საქართველოს“ ლიდერი ნინო ბურჯანაძე სკეპტიკურად უყურებს ინიციატივას, რომ ევროკავშირმა თვითონ წარმოადგინოს ალტერნატიული წინადადებები, რომელსაც ოპოზიციას და ხელისუფლებას მოლაპარაკების ფარგლებში შესთავაზებს და აცხადებს, რომ ის მზადაა მოისმინოს ევროკავშირის წინადადებები თუ უკეთეს გამოსავალს შესთავაზებს მხარეებს, თუმცა "ვერ ხვდება ეს რა შეიძლება იყოს".

"გონიერი ადამიანები ვართ, უმეტესობა ყოველ შემთხვევაში, ამიტომ თუ ვინმე იმაზე უკეთეს გამოსავალს შემოგვთავაზებს, ვიდრე ჩვენ მიგვაჩნია, ბუნებრივია, ასეთ გამოსავალს მივიღებთ. მაგრამ, სიმართლე გითხრათ, ვერ ვხვდები, ეს რა შეიძლება იყოს.

ორი ყველაზე მნიშვნელოვანი საკითხი - პოლიტიკური პატიმრების გათავისუფლება და დევნის შეწყვეტა. ამაზე რა უნდა შემოგვთავაზოს ევროკავშირმა ან ვინმემ, გარდა იმისა, რომ ხელისუფლებას უთხრას, შეწყვიტე პოლიტიკური დევნა და გამოუშვი პოლიტიკური პატიმრები?

მეორეა ვადამდელი არჩევნების თემა. შეიძლება, ტექნიკურად იყოს შემოთავაზება, როდის და როგორ შიძლება, მაგრამ უსაშველოდ ვერ გადაიწევს ვადამდელი არჩევნების თემა.

მოსმენა ყველასი ღირს, ხანდახან არაადეკვატურმა მხარემაც კი შეიძლება ძალიან საინტერესო წინადადება წარმოთქვას, მითუმეტეს, როდესაც საუბარია ევროკავშირის წინადადებაზე.

რა თქმა უნდა, მოსმენით მოვისმენთ, იმედი მაქვს, რამე ისეთი იქნება, რასაც ახლა ვერ ვხვდები, თუმცა იშვიათად არის, რომ რამეს ვერ ვხვდებოდე“, - აცხადებს ბურჯანაძე "დღის ნიუსრუმში".