"მოქალაქეების" ერთ-ერთი ლიდერის ლევან იოსელიანის განცხადებით, მელიას დაკავებამ ხელისუფლებასა და ოპოზიციას შორის დიალოგის პროცესი გაართულა. მიუხედავად ამისა, იოსელიანი განმარტავს, რომ მოლაპარაკებების განახლების რესურსი არსებობს და ამის ერთ-ერთი ნათელი მაგალითია ევროსაბჭოს პრეზიდენტის შარლ მიშელის ვიზიტი საქართველოში:

"ბოლო დროს განვითარებულმა მოვლენებმა, ვგულისხმობ ნიკა მელიას პატიმრობას, უფრო გაართულა ეს პროცესი და გარკვეული თვალსაზრისით ჩიხში შეიყვანა, მაგრამ მოლაპარაკებებისთვის რესურსი არსებობს. მიმაჩნია, რომ შარლ მიშელის ჩამოსვლა არის ძალიან მნიშვნელოვანი ვიზიტი. რამდენიმე საათში მასთან შეხვედრა მექნება. გავაცნობ იმ სიტუაციას, რაც არის საქართველოში, მათ შორის ოპოზიციასთან დაკავშირებით ხელისუფლების მიერ გადადგმული ნაბიჯების შესახებ მივაწვდი ინფორმაციას. მგონია, რომ ეს მნიშვნელოვანი ვიზიტი ხელს შეუწყობს პოლიტიკური კრიზისის განმუხტვის შესაძლებლობას.

ძალიან სამწუხარო სიტუაცია მივიღეთ, როდესაც ოპოზიციის დიდი ნაწილი პარლამენტს გარეთაა, მაგრამ საბოლოოდ მგონია, რომ ეს კრიზისი მოლაპარაკებებით დასრულდება. ამის წინაპირობას ვხედავ. შარლ მიშელის ვიზიტიც ადასტურებს ერთ რამეს, რომ ყველა ჩვენი მეგობარი დაინტერესებულია პოლიტიკური სტაბილურობით და ვფიქრობ, ამას მივაღწევთ.

ამ სიტუაციაში ყველა მხარემ უნდა გაიაზროს, რომ ერთადერთი სწორი გამოსავალი კომპრომისია და მხარეებმა უნდა მოიფიქრონ, რა არის მათთვის კომპრომისი", - განაცხადა იოსელიანმა.