ბოლო დროის ერთ-ერთი გახმაურებული საქმე, რომელიც რძალ-მამამთილის და მამამთილის ადვოკატის ცემას ეხება, გრძელდება. მართალია, ჩანიშნული პროცესი გადაიდო, თუმცა რძალმა მეუღლის ოჯახი დატოვა და ამის შესახებ “პრაიმტაიმს” ესაუბრა.

როგორც თიანეთში მცხოვრებმა მანანა ახალაურმა განაცხადა, ის ქმარს გაშორდა და სახლი დატოვა. მისი თქმით, მამამთილის მხრიდან, საფრთხეს გრძნობდა და ასე ცხოვრება აღარ შეეძლო. მანანა ახალაური იმავე სოფელში, სხვა უბანში დასახლდა და სკოლაში პედაგოგიურ მოღვაწეობას კვლავ აგრძელებს.

არსებული ინფორმაციით, 96 წლის ვარდო თათარაშვილმა საქველმოქმედო ფონდის „ერთობა საქართველოსთვის“​ დაქირავებული ბინა დატოვა და შვილიშვილმა წაიყვანა.

“ახლა, ჩემი მამამთილის ადგილ-სამყოფელი ნამდვილად არ ვიცი, მივატოვე ოჯახი და საცხოვრებლად სხვაგან გადავედი. 26 წლის ოჯახი დავანგრიე და ამ კონფლიქტის გამო სახლიდან წავედი.

მე იმ სახლში ცხოვრება არც ფიზიკურად შემიძლია და არც მორალურად, რადგან ამ კაცის (მამამთილი) აგრესიისგან თავს ვერ დავიცავ, შეიძლება მომკლას და ამიტომაც, წავედი.

– როგორია თქვენი მეუღლის პოზიცია?

– როცა არ მეცხოვრება, ჩემი მეუღლე ხომ ვერ დამაბამს და იქ ცხოვრებას მაიძულებს?! რა ქნას ქმარმა, ის მამაა და რას უზამს, სანამ ის ცოცხალია, მინდა დიდხანს იცოცხლოს, არ შემიძლია იქ ყოფნა.

– სამსახური დატოვეთ?

– ტერიტორიულად იგივე სოფელში ვარ, სხვა უბანში. ამიტომ, სამსახური არ დამიტოვებია. სახლში მხოლოდ ჩემი ქმარი იმყოფება. შვილი თბილისშია, სტუდენტია.

– რატომ გადაიდო სასამართლო პროცესი?

– იმიტომ, რომ ჩემს ადვოკატს თიანეთში ჩამოსვლა არ შეეძლო, რადგან სხვა ორი პროცესი ჰქონდა.

ცნობისთვის, შსს-მ მომხდარზე გამოძიება 126-ე პრიმა მუხლის პირველი ნაწილით დაიწყო, რაც ოჯახში ძალადობას გულისხმობს. შემაკავებელი ორდერის საფუძვლით მანანა ახალაურს მამამთილთან მიახლოება აკრძალული ჰქონდა.

"პრაიმტაიმი"