პარლამენტის პირველმა ვიცე- სპიკერმა გია ვოლსკი მიხეილ სააკაშვილის განცხადებას გამოეხმაურა და აცხადებს, რომ ზუსტად თუ დავითვლით, სადღაც მე-16 განცხადებაა, როცა სააკაშვილი ჩამოსვლას აანონსებს.

ვოლსკის განმარტებით, სააკაშვილს სურს სხვებმა "ხელი გაანძიონ" და ამის შემდეგ ჩამოვიდეს.

"ცოტა რთულია იმ ქონების და საკუთრების დატოვება, რაც თუნდაც უკრაინაში ან ამერიკის შეერთებულ შტატებში გააჩნია, მაგრამ მეორე მხრივ, როგორც თვითონ ამბობს: "ხელი გაანძირეთ და ჩამოვალო" - ეს არის მთავარი ფორმულა, რომელსაც სთავაზობს. მე არ მინდა სარკასტული განცხადება გავაკეთო, მაგრამ ერთი უნდა ვთქვა, სამწუხაროა, რომ დღეს სააკაშვილი განაგებს იმ სიტუაციას, რომელიც სუფევს შალვა ნათელაშვილის ფანჩატურში,"- განაცხადა ვოლსკიმ.

შეგახსნებთ, სააკაშვილის განცხადებას: "მე არასდროს მიმიცია პირობა, რომ კონკრეტულ რიცხვში დავბრუნდებოდი, მაგრამ თუ საჭირო გახდება მსგავსი პირობის მიცემა, ამასაც გავაკეთებ. მე ყოველთვის ვასრულებ ჩემს დანაპირებს".