"ნაციონალური მოძრაობის" ერთ-ერთი ლიდერი, თინა ბოკუჩავა , ელჩებთან შეხვედრის შემდეგ აცხდებს, რომ დასავლელი პარტნიორები უკიდურესად შეშფოთებულები არიან.

მისივე თქმით, ნიკა მელიას დაკავების ფონზე, მის დამკავებელთა პოლიტიკურ ვაჭრობაში შესვლა სწორად არ მიაჩნიათ.

"როგორც წესი, დიპლომატიურ ურთიერთობებში ბერკეტი არის განცხადებები და დღეს რა განცხადებებიც ვიხილეთ აშშ-ს მხრიდან, სადაც პირდაპირ იყო იმაზე საუბარი, რომ სამწუხაროდ, საქართველომ არ გაითვალისწინა აშშ-სა და სხვა საერთაშორისო პარტნიორების რჩევა, რომ მომხდარიყო სიტუაციის დეესკალაცია და ამ რჩევების საწინააღმდეგოდ განახორციელა შტურმი, რომ ეს საქართველოს ევროატლანტიკურ ინტერესებს ეწინააღმდეგება, ამაზე მკაცრი და მკაფიო განცხადება დიპლომატიურ ენაზე არ არსებობს. ამის შემდეგ არის უკვე ინდივიდუალური სანქციები. ეს დახურული შეხვედრა იყო და რაზე იყო საუბარი, დეტალებზე ვერ ვისაუბრებთ, თუმცა ერთი შემიძლია გითხრათ, რომ ჩვენი დასავლელი პარტნიორები არიან უკიდურესად შეშფოთებული. ივანიშვილს არჩევანი აქვს, ან უნდა აირჩიოს მოლაპარაკების გზა ან საბოლოოდ, აუცილებლად ჩადგება სანქცირებული ოლიგარქების მწკრივში.

ნიკა მელიას დაკავების ფონზე, მის დამკავებელთან პოლიტიკურ ვაჭრობაში შესვლა, არ მიგვაჩნია სწორად. რა თქმა უნდა, პოლიტპატიმრების გათავისუფლება ის პრინციპული საკითხი უნდა იყოს, რომლის შემდეგაც შესაძლებელი იქნება სხვა საკითხებზე, მათ შორის, ვადამდელ არჩევნებზე საუბარი, რომელიც მიგვაჩნია, რომ სიტუაციის განმუხტვის ლეგიტიმური გზაა“,-აღნიშნა ბოკუჩავამ.

ცნობისთვის, ოპოზიციისა და ელჩების შორის შეხვედრა გაიმართა - დღეს დილით განივთარებული პროცესების შემდეგ, ეს აუდიენცია საგანგებო რეჟიმში, მოულოდნელად ჩაინიშნა.