3 წელი არჩილ ტატუნაშვილის მკვლელობიდან - დღეს მუხათგვერდის ძმათა სასაფლაოზე საოკუპაციო ძალების მიერ მოკლული ტატუნაშვილის ოჯახის წევრები და მეგობრები შეიკრიბნენ და მის ხსოვნას პატივი მიაგეს.

არჩილ ტატუნაშვილის მამა გივი ტატუნაშვილი მისი შვილის მკველელობისა და წამებისთვის მსჯავრდებული პირების დაკავებას ითხოვს:

"ჩემი შვილის მკვლელები არ დასჯილან. წამებასა და მკვლელობაში ვინც არიან დამნაშავეები, იმათ კი მიესაჯათ სამუდამო პატიმრობა, მაგრამ დღემდე დაუსჯელები არიან. ეს 2 ადამიანი იძებნება წითელი ცირკულარით. რუსეთი ინტერპოლის წევრი ქვეყანაა, მაგრამ... საერთაშორისო საზოგადოებამ, ქვეყნებმა მოახდინონ ზეწოლა რუსეთზე, რომ დააკავონ ის 2 ადამიანი, რომ აღარ მოხდეს სხვა ადამიანების გატაცება და დაკავება, ბოლო იყოს ჩემი შვილი, არ მოხდეს მკვლელობა, ციხეში ჩასმა. კიდევ არავინ გამწარდეს" - განაცხადა გივი ტატუნაშვილმა.

შეგახსენებთ, რომ ყოფილი სამხედრო არჩილ ტატუნაშვილი საოკუპაციო ძალებმა 2018 წლის 22 თებერვალს გაიტაცეს და წამებით მოკლეს.