სახლისუფლებო გუნდის პრემიერობის კანდიდატმა ირაკლი ღარიბაშვილმა, რომელმაც თავისი სიტყვით გამოსვლისას ძირითადი დრო ოპოზიციის მუქარასა და ლანძღვას დაუთმო, ხაზგასმით აღნიშნა, რომ არ აპირებს კრიმინალ ოპოზიციასთან დიალოგს. ღარიბაშვილმა ოპოზიციის წარმომადგენლებს რადიკალურ ტერორისტებად ჩამოყალიბებული ადამიანები უწოდა:

"ჩვენ უნდა მივხედოთ რეალური პრობლემების გადაწყვეტას. ხალხს უმარავი პრობლემა აქვს, სოფლის მეურნეობაში, სოფლებში, რეგიონებში, ეკონომიკაში, სიდუხჭირე, სიღარიბე. ამას სჭირდება მოგვარება და არა ამ კრიმინალებთან დაჯდომა და რიგგარეშე არჩევნებზე საუბარი. რომელ არჩევნებზე გვესაუბრებიან საერთოდ. მე შევახსენებ ყველას, მათ შორის, ჩვენს საერთაშორისო პარტნიორებს, როგორი არჩევნები ტარდებოდა 2012 წლის არჩევნების ჩათვლით, როგორი ძალადობრივი, როგორი საშინელი ტერორის ქვეშ უწევდათ მოქალაქეებს ხმის მიცემა. ეს ყველაფერი არცთუ შორეულ წარსულში ხდებოდა. ეს ხდებოდა სულ რაღაც ცხრა წლის წინ. კიდევ ერთ კონკრეტულ მაგალითს შეგახსენებთ, ხურჩის ტერაქტი, ტერაქტად შერაცხული, რომელიც მოსახლეობის დაშინების მიზნით, თავადვე დადგეს და ჩვენი თანამოქალაქეები, მოხუცი ქალბატონი დაიჭრა. ეს ხალხია, ამ ხალხთან გვიწევს საუბარი. ასე რომ, ამ რადიკალურ, ტერორისტებად ჩამოყალიბებულ ადამიანებთან მე, რა თქმა უნდა, საუბრისა და დიალოგის არავითარი განწყობა არ მაქვს. ოპოზიციასთან მზად ვარ დიალოგისთვის და მთლიანად ჩვენი გუნდია მზად, მაგრამ ერთი დათქმით, რომ ისინი გაემიჯნებიან ამ კრიმინალურ საქმიანობას, ანტისახელმწიფოებრივ, ანტიკონსტიტუციურ საქმიანობას“, - განაცხადა ირაკლი ღარიბაშვილმა.