პარლამენტის იურიდიულ საკითხთა კომიტეტის თავმჯდომარის ანრი ოხანაშვილის განცხადებით, მმართველ გუნდში დაპირისპირება არ არის და ოცნების რიგებს არავინ ტოვებს. მისი განმარტებით, სახელისუფლებო ცვლილებები მხოლოდ ორ უწყებას - ინფრასტრუქტურისა და თავდაცვის სამინისტროს მოიცავს:

"დღეს ჩვენ ოთხი კომიტეტის გაერთიანებულ სხდომაზე დარგობრივი სპეციალიზაციის მიხედვით მოვისმინეთ, სამთავრობო გუნდის 4 წევრთან დაკავშირებით მათი ხედვები, სამთავრობო პროგრამა და ის გეგმები, რომლებიც მათ გააჩნიათ იმ უწყებებთან მიმართებაში, რომლებსაც ისინი უხელმძღვანელებენ, იმ შემთხვევაში, თუ პარლამენტი მათ ნდობას გამოუცხდებს. “ქართული ოცნების” გუნდი ერთსულოვნად დაუჭერს მხარს პრემიერ-მინისტრობის კანდიდატის ბატონი ირაკლი ღარიბაშვილის მიერ წარმოდგენილ სამთავრობო გუნდს და სამთავრობო პროგრამას, რადგან ეს გუნდი პროფესიონალია, მათ შესწევთ უნარი გეგმები და ხედვები, რომლებიც გააჩნიათ ცხოვრებაში ეფექტურად გაატარონ. აქედან გამომდინარე, ვერანაირ დაპირისპირებაზე ვერ ვისაუბრებ, გუნდიდან არავინ არ მიდის. გუნდი კონსოლიდირებულია, ჩვენ მხარს დავუჭერთ, პლენალურ სხდომის განხილვის შემდგომ წარმოდგენილ სამთავრობო გუნდს. შესაბამისად, მთავრობა და პარლამენტი გააგრძელებენ მუშაობას ჩვენი ხალხისა და ქვეყნის ინტერესების შესაბამისად.

იცით რომ თავდაცვისა და ინფრასტრუქტურის მინისტრობის ახალი კანდიდატი გვყავს, ესაა სიახლე სამთავრობო გუნდთან მიმართებაში, რაც შეეხება გეგმასა და ხედვას, რაც “ქართული ოცნების” გუნდს ჰქონდა, რომელიც გაცხადებული იყო ჩვენი ქვეყნის დეოკუპაციის მიმართულებით კონკრეტული ნაბიჯების გადადგმა, ჩვენ ვრჩებით იმ პრინციპების, რაც "ქართულ ოცნებას" გააჩნია", - განაცხადა ოხანაშვილმა.