ვადამდელი არჩევნები და პოლიტპატიმრების გათავისუფლება - ოპოზიცია ხელისუფლებას მოლაპარაკებას ურჩევს და დროებით აქციებს აჩერებს

პოლიტიკა - 21:06, 21 Feb, 2021

1406

ეროვნულ-დემოკრატიული პარტიის ლიდერმა ბაჩუკი ქარდავამ 25 თებერვალს ჩანიშნული აქციის გაუქმების მნიშვნელობაზე ისაუბრა და განაცხადა, რომ ოპოზიციის ნაბიჯი სახელმწიფოებრივი ინტერესებიდან გამომდინარეობს და ის ქვეყანაში არსებული პოლიტიკური კრიზისის განმუხტვასა და ეკსალაციის თავიდან არიდებას ემსახურება. ქარდავას თქმით, ეს არის შანსი ხელისუფლებისთვის, მოეგოს გონს და დაუბრუნეს მოლაპარაკების მაგიდას:

"ოპოზიციის გადაწყვეტილება სახელმწიფოებრივი ინტერესებიდან გამომდინარეობს. ჩვენ გვსურს, მივაღწიოთ მიზანს, მაგრამ ამავდროულად, ვცდილობთ იმასაც, რომ ამ ნაბიჯებს არ შეეწიროს სახელმწიფოს ინტერესები, რაც აბსოლუტურად არ შეინიშნება დღევანდელი ხელისუფლების პირობებში. ხელისუფლების წევრებისთვის სულ ერთია, ოღონდ დასხდნენ თავიანთ სკამებზე და რის ხარჯზე მოხდება ეს, მთ ინტერესებში არ შედის. ამდენად, განსხვავებული პოზიციებიდან გამომდინარე, ეს ბრიფინგიც სწორედ ამაზე იყო საუბარი. მოგეხსენებათ, ჩვენ საგაზაფხულო საპროტესტო ტალღის დაანონსებაც მოვახდინეთ რამოდენიმე თვის უკან, ფაქტობრივად, ოპოზიცია მზად არის ამ პროცესისთვის, ეს ტალღა კი უნდა დაწყებულიყო 25 თებერვალს. ეს თარიღი შემთხვევითი არ არი - გარდა იმისა, რომ მიმდინარე პოლიტიკურ პროცესებს გავაპროტესტებდით, ეს არის უდიდესი ტრაგიკული თარიღი საქართველოს ისტორიაში, მოხდა საქართველოს გასაბჭოება და ამ გასაბჭოებიდან 100 წელი შესრულდა. ოკუპაციასთან დაკავშირებით ჩვენ გვექნებოდა ჩვენი საპროტესტო ღონისძიებები რუსეთთან მიმართებაში და, სამწუხაროდ, ჩვენი ხელისუფლება რუსეთისგან შორს არ არის. მიუხედავად იმისა, რომ ძალიან მნიშვნელოვანი იყო ეს აქცია, ღევანდელი პოლიტიკური კონიუქტურიდან და საერთაშორისო თანამეგობრობის ძალისხმევიდან გამომდინარე, პოლიტკური კრიზისის განმუხტვის მიზნით ჩვენ ეს ნაბიჯი გადავდგით. დროებით უარს ვაცხადებთ 25 თებერვალს ჩანიშნულ აქციაზე, თუ რა თქმა უნდა, ხელისუფლება გონს მოეგება და მოლაპარაკების მაგიდას დაუბრუნდება იმ საკითხებთან დაკავშირებით, რომელიც არის პრინციპულად მნიშვნელოვანი - ეს არის ვადამდელი საპარლამენტო არჩევნები და პოლიტპატიმრების გათავისუფლება" - განაცხადა ბაჩუკი ქარდავამ.