25 თებერვალს ჩანიშნული აქცია გადაიდო - ოპოზიციამ ოცნებას მოლაპარაკებებისთვის გონივრული ვადა მისცა

პოლიტიკა - 19:09, 21 Feb, 2021

1927

საქართველოს სტრატეგიული ანალიზის ცენტრში მესამე სექტორისა და ლიეტუვის პარლამენტის საგარეო ურთიერთობათა კომიტეტის თავმჯდომარის ზიგიმანტას პავილიონისის შეხვედრის დასრულების შემდეგ ოპოზიციური პარტიების ლიდერებმა სპეციალური განცხადება გააკეთეს. ბრიფინგი ორგანიზაციის დამფუძნებელმა ნოდარ ხარშილაძემ გახსნა და ოპოზიციასა და საერთაშორისო აპარტნიორებს მადლობა გადაუხადა პოლიტიკური კრიზისის განმუხტვისთვის მუშაობაში და იმედი გამოქვა, რომ ხელისუფლების მხრიდანაც ანალოგიურ ქმედით ნაბიჯებს დაინახავს:

"მთელი დღის განმავლობაში მიმდინარეობდა კონსულტაციები ჩვენი დიდი ხნის მეგობართან პავილიონისთან, ასევე სხვა საერთაშორისო პარტნიორებთან. რეკომენდაციების ფონზე მიღებული იქნა გადაწყვეტილებები, რომელიც ძალიან სწორი ნაბიჯია ჩვენი ოპოზიციის მხრიდან. გვაქვს მოლოდინი, რომ ხელისუფლებაც გადადგამს საჭირო ნაბიჯებს, რათა განიმუხტოს კრიზისი და ქვეყანაში მოხდეს სტაბილურობის აღდგენა" - განაცხადა ხარშილძემ.

ბრიფინგზე სიტყვით გამოვიდა პავილიონისიც, რომელმაც პირველი კოსტიტუციის დღე მიულოცა საზოგადოებას, შემდეგ კი დიალოგის მნიშვნელობასა და მხარეთა შეთანხმების აუცილებლობაზე ისაუბრა:
"ჩვენ გვინდა თქვენი თავისუფლება, თქვენი კონსტიტუციური ღირებულებები იყოს დაცული და კონსოლიდირებული ტრანსატლანტიკურ ოჯახში. ჩვენ ვიბრძოლებთ იმისთვის, რომ დაიმკვიდროთ ადგილი ჩვენს შორის, მაგრამ ამისთვის უნდა აჩვენოთ მზაობა.
მე ვმონაწილეობდი ჩემი ქვეყნის წევრობისთვის მოლაპარაკებებში, კოპენჰაგენის დემოკრატიის კრიტერიუმების მიხედვით. ეს მნიშვნელოვანი იყო მაშინ და კიდევ უფრო მნიშვნელოვანია ახლა. მსოფლიოში დემოკრატია მცირდება. დემოკრატია დარტყმის ქვეშაა ყველგან, ვაშინგტონის ჩათვლით. ეს ნიშნავს, რომ დემოკრატია ხდება უდიდესი დედაქალაქების საგარეო პოლიტიკის დღის წესრიგის ცენტრი.
ასე რომ, ვასრულებ ჩემს ვიზიტს, მაგრამ იმედს გამოვთქვამ, სხვებიც ჩამოვლენ და კონცენტრირდებიან დემოკრატიაზე საქართველოში. იმიტომ, რომ დემოკრატიის, სხვების აზრის პატივისცემის, ოპოზიციასთან მუშაობის გარეშე, მათი ხმების მოსმენის და უფლებების დაცვის გარეშე თქვენ ვერ გახდებით ევროკავშირის და ნატოს წევრები", - განაცხადა ლიეტუველმა პოლიტიკოსმა.

ენმ-ს წევრმა ხატია დეკანოიძემ კი სპეციალური განცხადება გააკეთა და აღნიშნა, რომ ქვეყანაში არსებული პოლიტიკური კრიზისის განსამუხტად, ოპოზიციურმა ერთობამ მიიღო გადაწყვეტილება, უარი თქვას 25 თებერვალს ჩანიშნულ საპროტესტო აქციაზე და მზაობა გამოთქვა ხელისუფლებასთან მოლაპარაკებებზე. დეკანოიძემ განმარტა, რომ ამ ქმედებით ოპოზიცია ოცნებას აძლევს გონივრულ ვადას, რათა მიუსხდნენ მოლაპარაკებათა მაგიდას:

"პირველ რიგში მინდა მადლობა გადავუხადო ჩვენს საერთაშორისო პარტნიორებს, ვინაიდან მთელი ამ დღეების განმავლობაში ისინი ცდილობენ განმუხტონ და დაგვეხმარონ უმძიმესი პოლიტიკური კრიზისის მოგვარებაში და ეს კრიზისი, რა თქმა უნდა, არ დაწყებულა მხოლოდ დღეს, არამედ დაიწყო მათ შორის 20 ივნისიდან და სწორედ ამ "გავრილიადის" გაგრძელების გამო პოლიტიკურად დევნიან ნიკა მელიას. ჩვენ, მთლიანი ოპოზიციური სპექტრი და საერთაშორისო პარტნიორები როდესაც ვსაუბრობთ იმაზე, რომ ჩვენი ქვეყნის მომავლისთვის ძალიან მნიშვნელოვანია ის, რომ ყველა მხარე იქცეოდეს უაღრესად დიდი პასუხისმგებლობით, ჩვენი ქვეყნის ევროატლანტიკური მომავლისთვის ყველა მხარე მიჯდეს მოლაპარაკების მაგიდას და ჩვენ ეს დავაანონსეთ და განვაცხადეთ, რომ ერთადერთ გამოსავლად გვესახება მოლაპარაკებები ჩვენს საერთაშორისო პარტნირებთან ერთად. შესაბამისად, ისევ შევთავაზეთ ხელისუფლებას, მოსულიყო მოლაპარაკებები მაგიდასთან. ჩვენ დღეს ის თემები განვიხილეთ, რის გარშემოც გავერთიანდით ოპოზციური სპექტრი, ჩვენს საერთაშორისო პარტნიორებს ასევე გააჩნიათ ის აზრი, რომ დიალოგს ალტერნატივა არ აქვს. მინდა ასევე ვისაუბრო ერთ მნიშვნელოვან საკითხზე - თქვენ იცით, რომ ნიკა მელიას მიმართ პოლიტიკური დევნა, რომელიც ასევე დაადასტურა საქართველოს მთავრობის მეთაურის, პრემიერ-მინისტრ გიორგი გახარიას გადადგომამ, ამ შემთხვევაში პოლიტიკური კრიზისი კიდევ უფრო მეტად დამძიმდა. ამიტომ, ვფიქრობთ, რომ ესკალაციის თავიდან ასარიდებლად და პოლიტიკური კრიზისის განმუხტვისთვის ორივე მხარემ გავაკეთოთ ყველაფერი. ამ შემთხვევაში 25 თებერვალს დაანონსებული აქცია გადაიდო. ამით ხელისუფლებას ვაძლევთ ვადას, რომ დავსხდეთ მოლაპარაკების მაგიდასთან" - განაცხადა ენმ-ს წევრმა ხატია დეკანოიძემ.

სპეციალურ ბრიფინგზე ასევე სიტყვით გამოვიდნენ ოპოზიციის სხვა ლიდერებიც და აღნიშნეს, რომ ეს არის მათი პასუხისმგებლობა, თავი აარიდონ ქვეყანაში პოლიტიკურ დაძაბულობასა და ესკალაციას, თუმცა, ხელისუფლება ასევე ვალდებულია, თავისი წილი პასუხისმგებლობით მიუდგეს საკითხს და ქვეყნის ევროატლანტიკური მომავალი ეჭვქვეშ არ დააყენოს. მათ ოცნების ლიდერებს ასევე დიალოგისკენ მოუწოდეს.