პარლამენტთან ვითარება დაიძაბა - პოლიციამ კიდევ რამდენიმე აქტივისტი დააკავა

პოლიტიკა - 16:28, 21 Feb, 2021

905

სამოქალაქო აქტივისტების მიერ პარლამენტის წინ კარვის დადგმის კიდევ ერთ მცდელობას მორიგი დაპირისპირება მოჰყვა. პოლიციამ აქციის კიდევ რამდენიმე მონაწილე დააკავა, რომელთა შორის ნიკა ნარსიაც არის.

ადგილზე უსაფრთხიების ზომები კიდევ უფრო მეტად გაძლიერდა. აქციის მონაწილეები სამართალდამცველების მისამართით სკანდირებენ "გავრილოვის პოლიცია".

ცნობისთვის, დღევანდელი დაკავებების პირველი ტალღის შემდეგ პოლიციამ აქციის მონაწილეებს უფლება მისცა, საბავშვო კარავი დაედგათ, თუმცა, დამატებითი კარვის გაშლას სიტვიერი და ფიზიკური დაპირისპირება მოჰყვა.

დაკავებებთან დაკაშვირებით შსს სპეციალურ განცხადებასაც ავრცელებს:

"დღეს, საკანონმდებლო ორგანოსთან მიმდინარე საპროტესტო აქციაზე, სამართალდამცველებმა ადმინისტრაციულ სამართალდარღვევათა კოდექსის 173-ე მუხლის (სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა) საფუძველზე 8 პირი დააკავეს.

არაერთი მოწოდებისა და გაფრთხილების მიუხედავად, აქციის მონაწილეები არ დაემორჩილნენ შინაგან საქმეთა სამინისტროს წარმომადგენლების კანონიერ მოთხოვნას, გააგრძელეს მართლსაწინააღმდეგო ქმედება, რის შემდეგაც მოხდა მათი დაკავება.

საპატრულო პოლიციის წარმომადგენლებმა აქციის მონაწილეებს არაერთხელ შესთავაზეს ალტერნატიული ადგილი კარვის გასაშლელად.

მნიშვნელოვანია, რომ აქციის მონაწილეებს რამდენიმე თვის განმავლობაში ჰქონდათ კარავი გაშლილი საკანონმდებლო ორგანოს მიმდებარედ, რაშიც პოლიციას მათთვის ხელი არ შეუშლია.

რაც შეეხება პარლამენტის შენობის წინ კარვის განთავსებას, "პოლიციის შესახებ" საქართველოს კანონის თანახმად, საზოგადოებრივი უსაფრთხოების, მართლწესრიგის დაცვის, სამართალდარღვევის თავიდან აცილებისა და პრევენციის მიზნით, აქციის მონაწილეებს ეზღუდებათ შესაძლებლობა, საკანონმდებლო ორგანოს წინ განათავსონ კარავი.

შინაგან საქმეთა სამინისტრო მოუწოდებს აქციის ორგანიზატორებსა და მონაწილეებს, დაიცვან საზოგადოებრივი წესრიგი, თავი შეიკავონ მძიმე პროვოკაციული ქმედებებისგან, პოლიციელების სიტყვიერი შეურაცხყოფისგან და დაემორჩილონ სამართალდამცველთა კანონიერ მოთხოვნებს.

სამართალდარღვევის ნებისმიერი ფაქტი პოლიციის მიერ, კანონის ფარგლებში, დაუყოვნებლივ იქნება აღკვეთილი" - ნათქვამია განცხადებაში.