ნეპოტიზმი გორის მერიაში და არამიზნობრივად გახარჯული დიდი თანხები - რა დაუჯდა ხალხს პანდემიის პირობებში მათი ფუფუნება?

პოლიტიკა - 11:31, 21 Feb, 2021

988

ოპოზიციის ინფორმაციით, სპორტის განვითარების ხელშეწყობის სააგენტოში გორის მერიის მაღალჩინოსნების ნათესავები არიან დასაქმებულები, რომელთა ხელფასებისთვისაც ბიუჯეტიდან სოლიდური თანხაა გამოყოფილი. გარდა შრომის მაღალი ანაზღაურებისა, დიდი რაოდენობით არის გაფლანგული თანხები რესტორნებისა და საწვავისთვისაც. ნეპოტიზმით დასაქმებული პირების მივლინება-სარესტორნო მომსახურება 20 ათასი, ხოლო ავტომობილებით გადაადგილება 15 ათასი ლარი დაჯდა - ეს ყველაფერი კი სააგენტოს ერთწლიანი დისტანციური მუშაობის რეჟიმის ფონზე.

ოპოზიციაში არსებობს ვარაუდი, რომ ბიუჯეტიდან თანხებს პირადი მიზნებისთვის იყენებენ:
"აღნიშნულ ააიპ-ს ჰქონდა ბიუჯეტი დაახლოებით 2 მილიონი ლარი, მაგრამ, ჩვენ არ ვიცით, რაში დაიხარჯა. 244 ადამიანი, რომელიც დასაქმებულია ამ ააიპ-ში, 80% მათ ხელფასებს მოხმარდა, მეტიც, სააგენტოს ხელმძღვანელი გიორგი პურიჭამიაშვილი, რომელიც ცნობილია იმით, რომ ზონდერ-ჯგუფებს აყალიბებს და შემდეგ ახალისებს, ის ადამიანები ჰყავს დასაქმებულები აქ. დიდი ხანია, ნეპოტიზმი ყვავის, ამაში კი ხელს უწყობს უთავმოყვარეო გორის მერი. ამ ააიპ-ში მუშაობს ხუბულურის ძმიშვილი, გიორგი პურიჭამიაშვილის ძმა" - განაცხადა ადგილობრივმა ოპოზიციონერმა ვასილისა ჯობახიძემ.
გიორგი პურიჭამიაშვილი, რომელიც ამ სააგენტოს ხელმძღვანელობს, არ უარყოფს, რომ აქ დასაქმებული ჰყავს საკუთარი ძმა. ის არც იმას უარყოფს, რომ თემურ ხუბულურის ძმა მისი მოადგილეა. რაც შეეხება კორუფციულ ნიშნებს, პურიჭამიაშვილის თქმით, მისი ააიპი დოკუმენტალურად სუფთაა.