ნაციონალური მოძრაობის თავმჯდომარე ნიკა მელია კიდევ ერთხალ აცხადებს, რომ ოპოზიცია ხელისუფლებასთან დიალოგისთვის ისევ მზად არის.

"დიდი მადლობა ჩვენს პარტნიორ სახელმწიფოს ლიეტუვას, რომელმაც წარმოუდგენელი ყურადღება გამოიჩინა ჩვენი სახელმწიფოს მიმართ ამ უმძიმეს ვითარებაში"- თქვა ნაციონალური მოძრაობის თავმჯდომარემ ჟიგიმანტას პავილიონისთან გაერთიანებული ოპოზიციის შეხვედრის შემდგომ.

„ძალიან დიდი მადლობა მინდა გადავუხადო ჩვენს პარტნიორ სახელმწიფოს ლიეტუვას, მის თვალსაჩინო წარმომადგენელს, რომელმაც ჩემი აზრით, წარმოუდგენელი ყურადღება გამოიჩინა ჩვენი სახელმწიფოს და ქვეყნის მიმართ, მაშინ, როცა ნამდვილად არის უმძიმესი ვითარება, ვითარება, როცა ძალიან ბევრი რამე არ არის პროგნოზირებადი, პოლიტიკური ცხოვრება საათობრივად იძაბება, ამ დროს, როცა დაუგეგმავი ვიზიტი ხორციელდება მხოლოდ და მხოლოდ ერთი მიზნით, რომ დეესკალაცია მოხდეს ვითარების, ეს რა თქმა უნდა, ძალზე დასაფასებელია. ჩვენ, ოპოზიცია და ოპოზიციის სახელით თამამად შემიძლია გითხრათ, ყველაფერს გავაკეთებთ იმისთვის, რომ პროცესის დეესკალაციას შევუწყოთ ხელი, მზად ვართ დიალოგისთვის და ჩვენი პარტნიორების, ლიეტუვას ჩართულობით და არამხოლოდ ლიეტუვას ჩართულობით, იმედს ვიტოვებთ, რომ ამ შემთხვევაში მაინც, ხელისუფლება რეალობას ადეკვატურად შეაფასებს. რაც მთავარია, ოპოზიციას როგორც ჰქონდა სურვილი, რომ ვითარება აქამდე არ მისულიყო, ისეთივე მოწადინებულია დიალოგისთვის, ოღონდ დიალოგი შედეგზე ორიენტირებული უნდა იყოს და არა დიალოგი დიალოგისთვის“- განაცხადა მელიამ.