მერამდენე "ცხელ გაზაფხულს“ გვიანონსებენ? ბოლოს თვითონ რჩებიან ხოლმე ცივ ზამთარში

მერამდენე "ცხელ გაზაფხულს“ გვიანონსებენ? ბოლოს თვითონ რჩებიან ხოლმე ცივ ზამთარში - ოხანაშვილი ოპოზიციაზე

პოლიტიკა - 21:35, 19 Feb, 2021

954

პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის შეფასებით, ნიკა მელიას საკითხთან მიმართებაში "ნაციონალური მოძრაობის" წარმომადგენელთა ნაწილის განცხადებები, რომ ადამიანთა ნაწილი კანონის წინაშე თანასწორნი არ არიან - "საბჭოური აზროვნების გამოვლინებაა".

მან ხაზგასმით განაცხადა, რომ კანონის წინაშე ყველა თანასწორია და კონკრეტული უწყება უზრუნველყოფს კანონის და დემოკრატიის ყველა სტანდარტის დაცვით ამ გადაწყვეტილების სისრულეში მოყვანას.

ოხანაშვილი ასევე გამოეხმაურა ოპოზიციის მხრიდან აქციების დაანონსებას და აღნიშნა, რომ ბოლოს ოპოზიცია "ცივ ზამთარში" რჩება.

"მე რომ გიპასუხოთ ის, რომ ადამიანები განსხვავდებიან კანონის წინაშე, ეს იქნება აბსურდი. ვინც ამას ცდილობს, რომ მარტივი ჭეშმარიტება ხალხში გაასაღოს ისე, თითქოს ადამიანები კანონის წინაშე თანასწორნი არ არიან, ეს არის ძალიან მძიმე გამოვლინება ამ ადამიანების აზროვნების, ვინც ასე უდგება საკითხს - თურმე არიან ადამიანები ზოგიერთნი თანასწორნი, ზოგიერთნი არ არიან კანონის წინაშე თანასწორნი. ეს არის ძალიან მძიმე, საბჭოური აზროვნების გამოვლინება, რომელიც მე არ მიკვირს "ნაციონალური მოძრაობის“ წარმომადგენლებისგან, ვინაიდან, ეს ადამიანები არიან საბჭოთა კავშირის მენტალობის მქონე ხალხი. აქედან გამომდინარე, ყველა მათ წინადადებაში თუ ქცევაში ან არის რადიკალიზაცია, ან ექსტრემიზმი, ან ასეთი საბჭოური აზროვნება და ლოგიკა.

რაც შეეხება კონკრეტულად ნიკა მელიას საკითხს, ეს არის კონკრეტული უწყების გადასაწყვეტი. კანონის წინაშე ყველა თანასწორია და კონკრეტული უწყება უზრუნველყოფს კანონის შესაბამისად, დემოკრატიის ყველა სტანდარტის დაცვით ამ გადაწყვეტილების სისრულეში მოყვანას.

მერამდენე „ცხელ გაზაფხულს“ გვიანონსებენ? ბოლოს თვითონ რჩებიან ხოლმე ცივ ზამთარში. ასე რომ, ეს პროცესი, რომელსაც ისინი აგრძელებენ რადიკალიზაციისკენ და ექსტრემიზმისკენ არის კრახისთვის განწირული და ასეც დასრულდება. ჩვენ ცივი გონებით, პასუხისმგებლობის დიდი გრძნობით და მოქალაქეების წინაშე ანგარიშვალდებულების პრინციპით ვხელმძღვანელობთ. შესაბამისად, ისინი დარჩებიან ცივ ზამთარში და იმ აზროვნებაში, რაც ვერ მოიშორეს და ვერ გადააფასეს ამ წლების განმავლობაში. ჩვენ არავის მივცემთ საშუალებას რადიკალიზაციის, ვინაიდან ეს არ არის ჩვენი მოქალქეების დაკვეთა“, - განაცხადა ოხანაშვილმა.