"ევროპული საქართველოს" ერთ-ერთმა ლიდერმა დავით ბაქრაძემ ჟურნალისტებთან საუბრისას განაცხადა, რომ ხელისუფლება პროვოკაციებზე წამოსვლას შეეცდება, ამიტომ, ნიკა მელიას მოუწოდა, რომ გარეთ გასვლისგან დროებით თავი შეიკავოს. მისივე განმარტებით, ოცნების რადიკალური ჯგუფები საკუთარი ძალაუფლების დემონსტრირებას არ მოერიდება, რის გამოც ქვეყანა სამოქალაქო დაპირისპირებამდე მივა:

"როცა ასე უყურებს დღევანდელი „ოცნების“ ხელისუფლება, რა თქმა უნდა, საფრთხე არსებობს, ამიტომ ჩემი რჩევა ნიკა მელიას მიმართ იქნებოდა, რომ სანამ ვითარება პოლიტიკურად არ გაირკვევა და არ დალაგდება, თავი აარიდოს გარეთ გასვლას, თავი აარიდოს ხელისუფლების მხრიდან პროვოცირების შესაძლებლობას და ნუ მივცემთ შანსს ხელისუფლებას, რომ ამ შემთხვევაში და ამ საქმეში, სადაც თავიდან ბოლომდე მტყუანია, მიაღწიოს ისეთ გამარჯვებას, რომელიც შემდეგ ქვეყანაში მოიტანს კიდევ დაპირისპირებას და დაძაბულობის მორიგ ტალღას.

ყველამ უნდა გაიგოს, რომ ეს არის გზა, რომელიც დაღუპვამდე მიიყვანს "ქართულ ოცნებას", მაგრამ დააზიანებს ქართულ სახელმწიფოსაც, ამიტომ თუ "ქართული ოცნების" რადიკალური ჯგუფი მზად არის, რომ საკუთარ სკამებს და საკუთარი ძალაუფლების ხიბლს გადააყოლოს ქართული სახელმწიფო, ჩვენი ქვეყნის და ჩვენი მოქალაქეების მომავალი, ეს იქნება მათი არჩევანი, რომელიც, პირველ რიგში, ამ ჯგუფს და "ქართულ ოცნებას" დაასრულებს.

მეორე გზა არის დიალოგის გზა, გზა იმისკენ, რომ მოვძებნოთ საერთო წერტილები და მოვძებნოთ ამ კრიზისიდან მშვიდობიანი გამოსავალი და ეს მშვიდობიანი გზა გადის ელჩების მონაწილეობით მოლაპარაკებაზე, საარჩევნო სისტემის შეცვლაზე, ახალ არჩევნებზე და ვითარების დამშვიდებაზე. ეს არის გზა, რომელსაც ირჩევს ოპოზიცია. ჩვენი ამოცანა არ არის კონფრონტაცია, ჩვენი ამოცანა არ არის ამ ქვეყანაში არეულობა და დაძაბულობა, დღესვე მზად ვართ დავსხდეთ მოლაპარაკებათა მაგიდასთან ელჩების მონაწილეობით, დღესვე დავიწყოთ საუბარი იმ კრიზისიდან გამოსავალზე, რომელშიც „ქართული ოცნების“ რადიკალებმა შეგვიყვანეს ყველა ერთად,"- განაცხადა ბაქრაძემ.