გახარიას დემარშით წასვლის შემდეგ, "ოცნებაში" რღვევა დაიწყო

გახარიას დემარშით წასვლის შემდეგ, "ოცნებაში" რღვევა დაიწყო - მმართველ პარტიას დეპუტატები ტოვებენ

პოლიტიკა - 12:06, 19 Feb, 2021

9317

მარტვილის საკრებულოს დეპუტატმა ზურაბ ბიგვავამ საკრებულოში "ქართული ოცნების" უმრავლესობა დატოვა. ამ ნაბიჯით მან გამოხატა მხარდაჭერა გიორგი გახარიას მიმართ, რომელიც გუშინ გადადგა.
მისი თქმით, ყოფილმა პრემიერმა პოსტიდან წასვლით სწორი გადაწყვეტილება მიიღო.

ბიგვავა ამბობს, რომ გახარიას გადადგომის ერთ-ერთი მთავარი მიზეზი "ქართულ ოცნებაში" არასწორი საკადრო პოლიტიკა იყო.

"მინდა გამოვეხმაურო გიორგი გახარიას გადადგომას.ამ რთულ მდგომარეობაში, გიორგიმ მიიღო ერთადერთი სწორი გადაწყვეტილება. ის გადადგა. ამ გადადგომისკან მას უბიძგა იმ მდგომარეობამ და რეალობამ, რაც შეიქმნა ქართული ოცნების გუნდში. წერტილი!!!

მე, ჩემი თანადგომა გამოვხატე 20 ივნისის ღამის შემდგომ გიორგისადმი და დღესაც ხმამაღლა ვიტყვი:

გიორგი გახარია არის სახელმწიფოებრივად მოაზროვნე სულით-ხორცამდე ქართველი კაცი. მან, თავისი ჭკვიანური და დროული ქმედებებით ბევრი ფორს-მაჟორული კრიზისი ააცილა ქვეყანას.

სამწუხაროდ, გიორგი გახარიას გადადგომა არის შედეგი 2012 წლიდან მოყოლებული ქართული ოცნების არასწორი საკადრო პოლიტიკის, რომელიც იყო დაფუძნებული "დავით საგანელიძესეულ საკადრო "სამჭედლოზე" და "ნამდვილი, თუ არანამდვილი" პირების ზეობაზე.

მე, ვამაყობ გახარიასთან ახლო ურთიერთობით და ის, ყოველთვის დარჩება ჩემს მეგობრად. ჩემი მხარდაჭერა შენ მეგობარო და ეს შემიძლია გამოვხატო ცოტა რამით:

მე, ვტოვებ მარტვილის მუნიციპალიტეტის საკრებულოში ქართული ოცნების უმრავლესობას. მჯერა, რომ ჭეშმარიტი ეროვნული ძალები, კიდევ ბევრ კარგ საქმეს გავაკეთებთ ქართველ ხალხთან ერთად ერის და ქვეყნის გასაერთიანებლად", - წერს დეპუტატი ფეისბუკზე.
აღსანიშნავია, რომ ზურაბ ბიგვავას გადაწყვეტილების შემდეგ მარტვილის საკრებულოს უმრავლესობა იშლება.