"ოცნებამ" გახარია "მამლის ყივილამდე" უარყო და ღარიბაშვილს ხოტბას ასხამს - "2012 წლის ღირებულებების სახეა" "ყოველთვის მისი მხარდამჭერი ვიქნები"

პოლიტიკა - 11:04, 19 Feb, 2021

1343

ქართული ოცნების დეპუტატების უმრავლესობამ ყოფილი პრემიერი გიორგი გახარია, რომელსაც "საუკეთესო კრიზის მენეჯერს", "საუკეთესო პრემიერს" უწოდებდა "მამლის ყივილამდე" უარყო.
ირმა ზავრადაშვილი ამბობს, რომ ღარიბაშვილი პრინციპების ერთგულია:
"ღარიბაშვილი არის 2012-იანელი. მის მხრებზე გადაიარა ყველა იმ პერიპეტიებმა, რაც 2011 წლიდან ქართულმა ოცნებამ გადაიტანა. შესაბამისად, მისი პასუხისმგებლობა არა მარტო ოფიციალურში, არამედ არაოფიციალურ ნაწილშიც და მორალის ნაწილში ძალიან დიდია. ვფიქრობ, ირაკლი ღარიბაშვილი ძალიან წარმატებული პრემიერი იქნება. ძალიან გამიხარდა მისი კანდიდატურის დაყენება. წარმატებას ვუსურვებ. ყოველთვის მისი მხარდამჭერი ვიქნები, რაზეა საუბარი"- აცხადებს ზავრიაშვილი.
ბატონი ირაკლი 2012 წლის ღირებულებების სახეა, მჯერა, საუკეთესო პრემიერი იქნებით - დაწერა რიმა ბერიძემ.

"მომავალი პრემიერი - ბატონი ირაკლი ღარიბაშვილი არის პრინციპული, პატრიოტი, სახელმწიფოებრივად მოაზროვნე, სახელმწიფო მმართველობაში გამოცდილი პიროვნება. მისი პრემიერობის დროს, საქართველომ ევროკავშირის ასოცირების ხელშეკრულებას მოაწერა ხელი და ვიზალიბერალიზაცია მოიპოვა

ის იყო ძალიან წარმატებული შსს მინისტრი, წარმატებული თავდაცვის მინისტრი, სადაც ჩვენი ჯარისკაცების სამუშაო პირობები უმაღლეს დონეზე ავიდა. ბატონი ირაკლი არის 2012 წლის 1 ოქტომბრის, იდეალებისა და ღირებულებების სახე. მე მჯერა, რომ თქვენ იქნებით საუკეთესო პრემიერი, თქვენ იქნებით ის პრემიერი ვინც 2024 წელს ხელს მოაწერს საქართველოს განაცხადს ევროკავშირში გაწევრიანებაზე. წარმატებები"- წერს ბერიძე.