პარტია "მოქალაქეების" ლიდერი, ალეკო ელისაშვილი, პრემიერ-მინისტრად ირაკლი ღარიბაშვილის კანდიდატურის წარდგენას ეხმაურება და აცხადებს, ძალიან ცუდი კანდიდატურა იქნა შერჩეული და "ოცნება" ჯიუტად განაგრძობენ უგუნური დაპირისპირების პოლიტიკას.

ელისაშვილის შეფასებით, ღარიბაშვილი ოპოზიციის მოძულე და ყველაზე კონფრონტაციულია.

"ძალიან ცუდი კანდიდატურა იქნა შერჩეული, ეს არის ერთ-ერთი უარესი, ვინც კი შეეძლო "ქართულ ოცნებას" დაესახელებინა. ჩვენ ვნახეთ, რომ როდესაც ის პრემიერი იყო, ნულოვანი შედეგი ჰქონდა. თვითონაც წვალობდა და ქვეყანასაც აწვალებდა. ღარიბაშვილის პიროვნულ თვისებებს რომ თავი დავანებოთ, ამ სიტუაციაში, "ქართულ ოცნებას" ისეთი ადამიანი უნდა შეერჩია, ვინც ნაბიჯებს გადადგამდა დეესკალაციისკენ. მათ კი, ყველაზე კონფრონტაციული ადამიანი შეარჩიეს. ეს იმის მანიშნებელია, რომ მმართველ გუნდს ამ სიტუაციიდანაც ვერ გამოაქვს ვერანაირი დასკვნა. ისინი ჯიუტად განაგრძობენ უგუნური დაპირისპირების პოლიტიკას.

ღარიბაშვილის დანიშვნა ძალიან ცუდი იქნება ქვეყნისთვის და ნიშნავს იმას, რომ ისევ კუნთების თამაშს განაგრძობს "ქართული ოცნება". ირაკლი ღარიბაშვილი ყველაზე მეტი მოძულეა ოპოზიციის,"- განაცხადა ალეკო ელისაშვილმა.