კონსტიტუციონალისტი ვახტანგ ხმალაძე ეხმაურება მმართველ გუნდში განვითარებულ მოვლენებს და აცხადებს, რომ "ამ წუთის მდგომარეობით "ოცნებაში" ე.წ.-მა ქორებმა გაიმარჯვეს".

მისივე შეფასებით, მთავარი და პირველი ე.წ. ქორი ხელისუფლებაში, ირაკლი კობახიძეა.

ვახტანგ ხმალაძე ამბობს, რომ გიორგი გახარიას მხრიდან გადადგომის შესახებ გადაწყვეტილების მიღებას არ გამორიცხავდა, თუმცა არა მელიას საკითხთან დაკავშირებით.

"გიორგი გახარიამ გადადგომისას რა განცხადებაც გააკეთა, ეს საფუძველს მაძლევს ვივარაუდო, რომ ამ წუთის მდგომარეობით, "ქართულ ოცნებაში" გაიმარჯვეს ე.წ. ქორებმა. ქორების გამარჯვების შემთხვევაში, მოსალოდნელია პრემიერ-მინისტრად იქნას წარდგენილი ქორი და არა მტრედი.

ქორებში ვგულისხმობ იმას, ვინც არ დათანხმდა იმას, რასაც გახარია ამბობდა. მათ შორის, რასაკვირველია, კობახიძეს და ის ერთ-ერთი პირველი ქორია, გარეგნულად რაც ჩანს. კულისებში შეიძლება უფრო მეტი ქორებიც არსებობენ, მაგრამ საზოგადოებას ელაპარაკებიან ქორები, კობახიძის სახით.

ზოგადად, გადაწყვეტილებას გადადგომის თაობაზე არ გამოვრიცხავდი, არა უშუალოდ მელიას ამბავთან დაკავშირებით, ზოგადად. იმიტომ რომ, გახარიას მოქმედებებიდან გამომდინარე, მიუხედავად იმისა, რომ არა ერთი მოქმედება მიმაჩნდა არასწორად და გაუმართლებლად, მის მოქმედებებში მაინც ყოველთვის ჩანდა ლოგიკური ანალიზი და ლოგიკური მოქმედება, მათ შორის, უკან დახევის უნარიც. მას შეეძლო უკან დაეხია, თუკი ხედავდა, რომ ვითარების დაძაბულობის მოხსნისთვის, ეს უკან დახევა იყო მნიშვნელოვანი და მას გაუკეთებია ასეთი გადაწყვეტილებები. ასეთი რამ მე ვერ შევამჩნიე კობახიძეს," - განაცხადა ვახტანგ ხმალაძემ "რუსთავი 2"-თან.

შეგახსენებთ, რომ პრემიერ-მინისტრმა, გიორგი გახარიამ, თანამდებობას დატოვა - როგორც გახარიამ განმარტა, მას გაუმართლებლად მიაჩნია ნიკა მელიას დაპატიმრება იმ პირობებში, როდესაც არსებობს პოლიტიკური ესკალაციის საფრთხე, გადადგომის მიზეზია ის, რომ აღნიშნულთან დაკავშირებით გუნდთან შეთანხმებას ვერ მიაღწია.