ლიეტუვის საგარეო საქმეთა სამინისტრო საქართელოში მიმდინარე პოლიტიკურ პროცესებს ეხმაურება და შეშფოთებას გამოთქვამს ნიკა მელიას მიმართ სასამართლოს ვერდიქტის გამოტანაზე. უწყების განცხადებაში ნათქვამია, რომ ეს ნაბიჯი მმართველ პარტიასა და ოპოზიციას შორის მოლაპარაკებების შანსს ამცირებს და ქვეყანაში შერჩევითი სამართლის ეჭვს აჩენს:

"ლიტვის საგარეო საქმეთა სამინისტრო შეშფოთებულია საქართველოში არსებული პოლიტიკური მდგომარეობით. პარლამენტის გადაწყვეტილება მთავარი ოპოზიციური პარტიის, ერთიანი ნაციონალური მოძრაობის ლიდერისთვის, ნიკა მელიასთვის იმუნიტეტი შეეჩერებინათ და პოლიტიკოსის შესაძლო დაკავება ამცირებს მმართველ პარტიასა და ოპოზიციას შორის დიალოგის შესაძლებლობას, აღძრავს კითხვებს ქვეყანაში შერჩევითი სამართლისა და კანონის უზენაესობასთან დაკავშირებით.

დასანანია, რომ ქართველმა პოლიტიკურმა ლიდერებმა ამ დრომდე არ გამოიყენეს ყველა შესაძლებლობა გადაეწყვიტათ შემოდგომის საპარლამენტო არჩევნებთან დაკავშირებული აზრთა სხვადასხვაობა. ვურჩევთ საქართველოს ხელისუფლებასა და ოპოზიციას თავი შეიკავონ მოქმედებებისგან, რომლებიც ჩიხში შეიყვანს პროცესს და გაყოფს საზოგადოებას, ასევე ვურჩევთ, თავი შეიკავონ მოქალაქეების წინააღმდეგ ძალის შესაძლო გამოყენებისგან. დარწმუნებულები ვართ, რომ საქართველოს სჭირდება ხელისუფლება, რომელსაც შეუძლია მიიღოს მნიშვნელოვანი გადაწყვეტილებები, რომლებიც ხალხის ინტერესებშია, როგორც ბოლო პერიოდის გამოწვევების ფონზე, ასევე საქართველოსა და ევროკავშირის ასოცირების შეთანხმების ფარგლებში გასატარებელი რეფორმების კონტექსტში" - ნათქვამია განცხადებაში.

რაც შეეხება ლიეტუვის საგარეო საქმეთა მინისტრს, გაბრიელიუს ლანდსბერგისმა ქართველ პარტნიორებს სიტუაციის დეესკალაციისა და ნორმალიზებისკენ მოუწოდა:

"მოვუწოდებთ ჩვენს პარტნიორებს საქართველოში, დაშორდნენ წითელ ხაზს, გამოიყენონ სიტუაციის დეესკალაციის შესაძლებლობა, მოძებნონ მდგომარეობის ნორმალიზების გზები და დაუბრუნდნენ კონსტრუქციულ დიალოგს" - განაცხადა ლანდსბერგისმა.

ხვალ კი ლიეტუვის საპარლამენტო დელეგაცია საქართველოში ჩამოვა და ოპოზიციონერ ლიდერებს შეხვდება - ამის შესახებ ლიეტუვის პარლამენტის წევრმა ზიგიმუნდ პავილიონმა განაცხადა.