თქვენმა ძალაუფლებაზე და სკამებზე ჩამოკიდებამ მიგვიყვანა იქამდე, რომ ქვეყანა შევიდა უმძიმეს პოლიტიკურ კრიზისში

თქვენმა ძალაუფლებაზე და სკამებზე ჩამოკიდებამ მიგვიყვანა იქამდე, რომ ქვეყანა შევიდა უმძიმეს პოლიტიკურ კრიზისში - ბაქრაძე ოცნებას

პოლიტიკა - 12:09, 18 Feb, 2021

773

პოლიტიკოსი დავით ბაქრაძე მოუწოდებს ოცნების გუნდს, რომ მოლაპარაკების მაგიდას დაუბრუნდნენ და ხელახალ არჩევნებზე იმსჯელონ. მისი განცხადებით, ივანიშვილის გუნდის წევრების ძალაუფლებასა და სკამებზე ჩამოკიდებამ ქვეყანა უმძიმეს პოლიტიკურ კრიზისში შეიყვანა:

"ვისაც აწუხებს და ვინც იბრძვის საქართველოში მშვიდობისთვის, დემოკრატიისთვის, პოლიტიკური დევნისა და შერჩევითი სამართლის შეწყვეტისთვის, მინდა თითოეულ ასეთ ადამიანს მივულოცო დღევანდელი დღე და ვუთხრა დიდი მადლობა. დიახ, ეს არის ქართული საზოგადოების, ქართული ოპოზიციური სპექტრის და პირადად ნიკა მელიას გამარჯვება. ჩვენ ყველამ ერთად ვაჩვენეთ, რომ ამ ქვეყანაში პოლიტიკურ დევნას, შერჩევით სამართალს, დაპირისპირებას, ზიზღს, აგრესიას, რომლის გამოწვევასაც მუდმივად ცდილობს ქართული ოცნება, არ აქვს მომავალი, მაგრამ მთავარი არის დღეს არა ნიშნის მოგება და არა საუბარი მიღწეულ შედეგზე, მთავარია ის, თუ როგორ შევძლოთ ყველამ ერთად, რომ ქვეყანაში იყოს სტაბილურობა, სიმშვიდე, წესრიგი და საქართველო დაუბრუნდეს ნორმალური განვითარების გზას. ამისთვის არსებობს ერთადერთი შესაძლებლობა - ეს არის შექმნილი პოლიტიკური კრიზისის განმუხტვა მოლაპარაკებების გზით და მინდა დავადასტურო ჩვენი მზადყოფნა დავუბრუნდეთ მოლაპარაკებების მაგიდას და იმ საკითხების განხილვას, რომელიც აუცილებელია ამ ქვეყანაში სიმშვიდის და ნორმალური მომავლისთვის, ეს არის რიგგარეშე არჩევნების ჩატარება, სადაც ქართული საზოგადოება გადაწყვეტს, ვინ მართოს ქვეყანა, პოლიტიკური დევნის შეწყვეტა და პოლიტიკურად მოტივირებული პროცესების ერთხელ და სამუდამოდ დასრულება, საარჩევნო სისტემის ცვლილება.

მინდა ვუთხრა ქართული ოცნების იმ გუნდს, რომელიც ცოტა ხნის წინ ცდილობდა ეჩვენებინა, რომ ქვეყანაში არაფერი ხდება - თქვენმა პოლიტიკამ, თქვენმა უგუნურებამ, საკუთარ ძალაუფლებაზე და სკამებზე ჩამოკიდებამ მიგვიყვანა იქამდე, რომ ქვეყანა შევიდა უმძიმეს პოლიტიკურ კრიზისში, მიგვიყვანა უდიდესი საფრთხეების წინაშე, რომ ამ ქვეყანაში მოხდეს არეულობა და საქართველოს მომავლის პერპექტივა კიდევ უფრო უკან გადაიწიოს" - განაცხადა ბაქრაძემ.