"ეს გადაწყვეტილება კატასტროფაა ქვეყნისთვის" - ასე ეხმაურება "გირჩი-მეტი თავისუფლებისთვის" ლიდერი, ზურა ჯაფარიძე , "ენმ"-ს თავმჯდომარის, ნიკა მელიასთვის , პატიმრობის შეფარდებას.

ჯაფარიძის შეფასებით, ხელისუფლებამ მელია დააკავა იმ საქმეზე , სადაც თვითონაა დამნაშავე.

"ჩემი აზრით, ეს გადაწყვეტილება არის კატასტროფა ქვეყნისთვის. ამ პოლიტიკურმა კრიზისმა, რომელიც აქამდეც ღრმა იყო, რასაც აჩვენებდა ის, რომ მოლაპარაკებების რაუნდები შედეგებით ვერ მთავრდებოდა, ისეთი მასშტაბები მიიღო, რომ ქვეყანა შეიძლება... ვერანაირი რაუნდი ახლა ვერ გაიმართება. შინაარსი არ აქვს ამ ყველაფერს, ხელისუფლება წავიდა იმაზე, რომ დააკავა ყველაზე მსხვილი ოპოზიციური პარტიის ახლადარჩეული თავმჯდომარე, დააკავა საქმეზე, სადაც თვითონაა დამნაშავე", — განაცხადა ჯაფარიძემ.

შეგახსენებთ , რომ მოსამართლემ, ნინო ჩახნაშვილმა, პროლკურატურის მოთხოვნა დააკმაყოფილა და ნიკა მელიას აღკვეთის ღონისძიების სახით პატიმრობა შეუფარდა - პროცესი 6 საათის განმავლობაში მიმდინარეობდა და მას ბრალდებული, ნიკა მელია არ დასწრებია.