პარტია "გამარჯვებული საქართველოსთვის" ლიდერი, ირაკლი ოქრუაშვილი, "ენმ"-ს თავმჯდომარის პატიმრობის შეფარდებას ეხმაურება და აცხადებს, რომ "ნიკა მელია გახდა თავისუფლების სიმბოლო".

ოქრუაშვილის განმარტებით, ეს გადაწყვეტილება ბიძინა ივანიშვილის ერთპიროვნული გადაწყვეტილებაა და რადაც არ უნდა დაუჯდეთ ოლიგარქს არ დაუთმობენ და ბოლომდე იბრძოლებენ.

"ეჭვი არ მეპარება, რომ ივანიშვილმა უკვე უპატაკა გავრილოვს ის საჩუქარი, რომელიც სპეციალურად მისთვის მომზადდა - ნიკა მელიას დაპატიმრების ვერდიქტი. შარშან, როდესაც 5 წლით თავისუფლების აღკვეთა მომისაჯეს და შემდეგ, მე და გიგი უგულავა გაგვათავისუფლეს პრეზიდენტის შეწყალების აქტით, კანონმორჩილი მოქალაქის გულუბრყვილობით ვიფიქრე, რომ ივანიშვილმა სწორი დასკვნები გააკეთა და ამ თემიდან დისტანცირებას ახდენს, მაგრამ დღეს ნიკა მელიასთვის პატიმრობის შეფარდებით, რომელიც იყო მისი ერთპიროვნული გადაწყვეტილება, ეს არ იყო ვინმე შოთაძის ან გახარიას გადაწყვეტილება, ეს იყო ბიძინა ივანიშვილის გადაწყვეტილება, ამ გადაწყვეტილებით მან შეურაცხყოფა მიაყენა ჩვენი ქვეყნის ყველა წესიერ, პატრიოტ, გულანთებულ, თავისუფლებისთვის მებრძოლ ადამიანს. არამარტო მათ, ვინც 20 ივნისის ღამეს გარკვეული დაზიანება მიიღო, არამედ ძალიან ბევრ ადამიანს ქვეყნის გარეთ და ქვეყნის შიგნით. ეს უკვალოდ არ ჩაივლის. ჩვენ არ ვართ პარტიული ჭრილით გაერთიანებულები, ნიკა მელიასთან მიმართებაში ეს ერთობა გასცდა ყოველგვარ ჩარჩოებს. ნიკა მელია გახდა თავისუფლების სიმბოლო და ჩვენ ამ თავისუფლებას ივანიშვილს არ დავანებებთ, გამორიცხულია! რა ფასადაც არ უნდა დაგვიჯდეს ეს. ჩვენ ერთხელ უკვე ვნახეთ მისი მხრიდან ჩვენზე გადავლა, როდესაც დავუთმეთ მას და ამ დათმობას აღარ ვაპირებთ“, - განაცხადა ოქრუაშვილმა "ენმ"-ს ოფისში გამართულ ბრიფინგზე.

შეგახსენებთ , რომ მოსამართლემ, ნინო ჩახნაშვილმა, პროლკურატურის მოთხოვნა დააკმაყოფილა და ნიკა მელიას აღკვეთის ღონისძიების სახით პატიმრობა შეუფარდა - პროცესი 6 საათის განმავლობაში მიმდინარეობდა და მას ბრალდებული, ნიკა მელია არ დასწრებია.